कोरोना भाइरसबाट मृत्यु हुनेमा ७० प्रतिशत पुरुष !
प्रकाशित मिति : बैशाख २, २०७७ मंगलबार
संसारका लागि चुनौती बनेको कोरोना भाइरसले ठूलोसानो सबैलाई त्रासमा पुऱ्याइदिएको छ । यसबाट गाडीचालकदेखि देशचालक ‘प्रधानमन्त्री एवं मन्त्रीहरू’ संक्रमित भएका छन् । आँखाले देख्न सक्ने बनाउन लाखौँ गुणा ठूलो पार्नुपर्ने एउटा सानो आनुवंशिक टुक्राले लाखौँ मानिसलाई संक्रमित बनाइसकेको छ ।
हुन त कोरोना भाइरसबाट संक्रमित भएर निको हुनेहरूको संख्या पनि ठूलै छ । जो संक्रमण भएर निको हुन सकेका छैनन् उनीहरू मृत्युवरण गर्न बाध्य भएका छन् । यसमा लैंगिक भिन्नता पनि मुख्य रूपमा देखिएको छ ।
अमेरिकामा काेराेना संक्रमणबाट महिलाकाे तुलनामा दोब्बरभन्दा बढी पुरुषहरूले ज्यान गुमाइरहेका छन् । त्यस्तै पश्चिमी युरोप एवं चीनलगायतका अन्य देशहरूमा मृत्यु हुनेमा करिब ६९ प्रतिशत पुरुष रहेका छन् । केही दिनअघि इटालीले मृत्यु भइरहेकामा ७१ प्रतिशतभन्दा बढी पुरुष रहेको एक रिपोर्ट प्रकाशित गरेको थियो ।
लन्डनको युनिभर्सिटी कलेजमा अन्ना पुर्डीको नेतृत्वमा एक टोलीले यसबारे अनुसन्धान गरिरहेको छ । अहिलेसम्म कुनै ठोस कारण भने पत्ता लागेको छैन । अक्सफोर्ड विश्वविद्यालयका इम्युनोलोजीका प्रोफेसर, फिलिप गोल्डर भने महिलाको प्रतिरक्षा प्रणाली बलियो हुनु एक कारण रहेको बताउँछन् ।
प्रतिरक्षा प्रणालीको प्रतिक्रियामा विभिन्न हर्माेन र ‘एक्स क्रोमोजोम’ले केही महत्वपूर्ण भूमिका निर्वाह गर्छ । मानव शरीरको जीवित कोषमा रहने क्रोमोजोम प्रोटिन र डिएनएबाट बनेको हुन्छ ।
कोरोनालगायतका भाइरसविरुद्ध सचेत गर्ने प्रोटिन एक्स क्रोमोजोममा हुन्छ, यसकारण पनि महिलामा हुने दुई क्रोमोजोमले प्रतिरक्षा प्रणालीको प्रतिक्रयालाई बलियो बनाएको हुन सक्ने प्रोफेसर गोल्भर बताउँछन् । महिलामा दुई एक्स क्रोमोजोम हुन्छन् भने पुरुषमा एउटा एक्स र अर्काे ‘वाई क्रोमोजोम’ हुन्छ ।
त्यस्तै अर्काे कारण, जीवनयापनको तरिकालाई पनि मानिएको छ । ‘जस्तो कि महिलाहरूको तुलनामा बढीजसो पुरुषहरूले धुम्रपान गर्ने गर्छन्, जसले अन्य रोगको सम्भावनालाई समेत बढाएको हुन्छ,’ गोल्डरले भने । यसले मृत्युदरमा महत्वपूर्ण भूमिका खेलेको हुन सक्ने उनको भनाइ छ । चीनमा करिब ५० प्रतिशत पुरुषले धुम्रपान गर्छन् भने करिब ५ प्रतिशत मात्रै महिलाले धुम्रपान गर्छन् ।
त्यस्तै पुरुषले महिलाको तुलनामा सरसफाइमा पनि कम ध्यान दिने गर्नुलाई यसको अर्काे कारण हुन सक्ने देखाइएको छ ।
तर, जोन्स हप्किन्स विश्वविद्यालयका प्रोफेसर डा. सब्रा क्लाइन भने महिलाको तुलनामा उल्लेख्य रूपमा पुरुषको मृत्यु हुनुमा ‘धुम्रपानबाहेकको अर्काे कुनै बायोलोजिकल कारण हुन सक्ने बताउँछन् ।
विभिन्न किसिमका भाइरसहरूविरुद्ध पुरुषको प्रतिरक्षा प्रणालीले देखाउने प्रतिक्रिया महिलाको भन्दा फरक हुन सक्ने र यसकारणले पनि बढी पुरुषको मृत्यु भएको उनको अनुमान छ । यद्यपि, महामारीको यस्तो अवस्थामा किटान नै गरेर मुख्य कारण यो हो भनेर तोक्न भने नसकिने विज्ञहरूको भनाइ छ । (बिबिसी र द गार्जियन)