लकडाउन उल्लंघन गर्नेलाई गोली हान्ने राष्ट्रपतिको चेतावनी
प्रकाशित मिति : चैत्र २०, २०७६ बिहीबार
फिलिपिन्सका राष्ट्रपति रोड्रिगो डुटर्टेले लकडाउन उल्लंघन गर्नेलाई गोली हान्ने चेतावनी दिएका छन् । राष्ट्रपति रोड्रिगोले लुजोनको टापुमा लागू गरिएको एक महिना लामो लकडाउनका बेला समस्या निम्त्याउने जो कोहीलाई पनि गोली हान्ने चेतावनी दिएका हुन् ।
बुधबार राति टेलिभिजनमार्फत प्रसारित उक सम्बोधनमा उनले भने- ‘मेरो आदेश प्रहरी र सेनाका अधिकारीलाई हो- डाक्टर र स्वास्थ्यकर्मीहरुलाई चोट नपुर्याउनुहोस्, किनकि यो गम्भीर अपराध हो । यदि कसैले समस्या पैदा गर्छ भने तिनीहरूलाइ गोली ठोक्नुहोस् ।’
सरकारसँग खाद्य सहायताको माग गर्दै प्रर्दशन गर्ने मनिलाको क्युजन सिटीका २१ प्रदर्शनकारीलाई पक्राउ गरेपछि डुटर्टोले यस्तो आदेश जारी गरेका हुन् । प्रहरी अधिकारी जनरल रोनी मोन्तेजोले लाखौं जनतालाई घरभित्रै क्वारेन्टिनमा बस्न भनिएको छ । यो नयाँ नियम तोड्नेविरुद्ध आपराधिक मुद्दा दर्ता गरिने उनले जानकारी दिए ।
स्यान्टिटाउनका बासिन्दाले दुई हप्ता अघिदेखि लागू गरिएको लकडाउनका बीच आफूहरुले सरकारबाट अन्य राहत सामग्रीका साथै खाद्य सहायता नपाएको गुनासो गरेका छन् ।
पक्राउ गर्नुअघि प्रदर्शनकारीले भनेका थिए, ‘हामी भोकको कारण मद्दतका लागि यहाँ आएका छौं। सरकारले हामीलाई खानेकुरा, चामल, पैसा केही पनि दिएकाे छैन । अहिले सबै बन्द छन्, हाम्रो कुनै काम छैन । हामी कसरी बाँच्ने ?’
२१ प्रदर्शनकारीलाई पक्राउ गरेपछि अन्य बासिन्दाहरूले पक्राउ परेका व्यक्तिहरूको रिहाइको माग गर्न जुलुस निकालेका थिए । स्यान्टिटाउनका ५७ मिलियन मानिसहरू अहिले लकडाउनमा छन् । फिलिपिन्समा अहिलेसम्म २ हजार ३११ जना काेराेना संक्रमित भेटिएका छन् भने ९६ जनाकाे मृत्यु भइसकेकाे छ ।