राष्ट्रपति ट्रम्पले संक्रमण रोक्ने नियम एक महिना बढाए
प्रकाशित मिति : चैत्र १७, २०७६ सोमबार
अमेरिकी राष्ट्रपति डोनाल्ड ट्रम्पले कोरोना भाइरसको संक्रमण रोक्न लागू गरिएका नयाँ नियमको अवधी थप एक महिना लम्ब्याएका छन् ।
एकअर्काबीचको दुरी कायम गर्नु पर्ने, धेरै मानिस भेला हुन नपाउने लगायतका नियम अझैं एक महिनाका लागि थप गरिएको हो ।
२५ मार्चमा ट्रम्पले अमेरिका आउँदो अप्रिलको मध्यतिर पूर्वीय देशहरु भन्दा अगाडि नै अमेरिकाले संक्रमणबाट राहत पाउने र सजगताका लागि लगाइएको नयाँ नियमहरु हटाउने बताएका थिए ।
तर, अपेक्षा गरे जस्तो संक्रमण नियन्त्रणमा हुनुको साट्टो थप संक्रमण हुन थालेपछि नियमको म्याद थपिएको हो ।
ह्वाइट हाउसका मेडिकल सल्लाहकार डा. एन्थोनी फौसीले अमेरिकामा कोरोना भाइरसबाट कम्तिमा २ लाखको मृत्यु हुन सक्ने चेतावनी दिएका छन् ।
उनले लाखौं अमेरिकी यसबाट संक्रमित हुन सक्ने भन्दै त्यसले मृत्युदर पनि बढाउने उनको चेतावनी छ ।
अमेरिका अहिले विश्वमै सबैभन्दा बढी संक्रमित भएको देशका रुपमा रहेको छ । अहिलेसम्म १ लाख ४० हजार भन्दा बढि अमेरिकी नागरिक कोरोनाबाट संक्रमित भइसकेका छन् । अमेरिकामा २ हजार ८ सय भन्दा बढिको मृत्यु भइसकेको छ । (एजेन्सी)