घरमै बस्न आदेश दिइएका अमेरिकाका १२ राज्य : कहाँ के गर्न अनुमति छ ?
प्रकाशित मिति : चैत्र १०, २०७६ सोमबार
अहिलेसम्म अमेरिकामा ४१ हजार ५ सय ११ मा कोरोना भाइरसको संक्रमण पुष्टी भएको छ । मृतकको संख्या पनि ५ सय पुगेको छ । यो अवस्थामा अमेरिकाका विभिन्न १२ राज्यमा सर्वसाधारणलाई घरभित्र बस्न आदेश दिइएको छ ।
क्यालिफोर्निया
गभर्नर गेभिन न्युसोमले गत विहिबार क्यालिफोर्निया राज्यमा यस्तो आदेश जारी गरेका थिए । अनिवार्य घरमा बस्न दिइएको आदेशपछि डाइन इन रेष्टुरेण्टहरु, बारहरु, जिम र कन्भेन्सन सेन्टरहरु बन्द गरिएका छन् ।
ग्रोसरी, फार्मेसी, ग्यास स्टेशन, फुड बैंक, कन्भिनेन्स स्टोर र डेलिभरी गर्ने रेष्टुरेण्टहरु खुला रहेका छन् । यो आदेशको कार्यान्वयनका लागि प्रहरी परिचालन गरिएको छैन । तर घरबाहिर निस्कनै पर्नेहरुलाई सामाजिक दूरी कायम गर्न सुझाव दिइएको छ ।
न्युयोर्क
गत शुक्रबार न्युयोर्कका गभर्नर एन्ड्रयु कुमोले अत्यावश्यक बाहेकका अन्य क्षेत्रमा काम गर्नेहरुलाई घरमै बस्न आदेश दिएका छन् । आइतबार बेलुकादेखि लागु भएको कार्यकारी आदेश अनुशार बन्द गर्न अवज्ञा गर्ने विजनेशहरुलाई जरिवाना गरिने उल्लेख छ ।
यस्तो जरिवाना व्यक्तिका लागि भने लागु हुनेछैन । तर गभर्नरले अनावश्यक रुपमा बाहिर ननिस्कन र जमघट नगर्न आदेश दिएका छन् । अत्वाश्यक काममा जानुपर्नेलाई सामाजिक दुरी कायम गर्न सुझाव दिइएको छ । ग्रोसरी स्टोर, खाना डेलिभरी र सार्वजनिक यातायात संचालनमा छन् ।
न्युजर्सी
न्युजर्सी राज्यमा पनि शनिबारदेखि घरभित्र बस्न आदेश दिइएको छ । गभर्नर फिल मर्फीले दिएको आदेशमा जमघट हुन प्रतिबन्ध लगाइएको छ । अत्यावश्यक बाहेकका सबै विजनेशहरु बन्द गर्न आदेश दिइएको छ । फार्मेसी, रक्सी पसल, ग्रोसरी स्टोर, ग्यास स्टेशन भने खुला रहनेछन् ।
वेष्ट भर्जिनिया, ओहायो, मिसिगन, मासाचुसेट्स
त्यस्तै वेष्ट भर्जिनियाका गभर्नरले पनि मंगलबार बेलुका ८ बजेदेखि लागु हुनेगरी घरमै बस्न आदेश जारी गरेका छन् । त्यहाँपनि अत्यावश्यक बाहेकका विजनेश बन्द गर्न निर्देशन दिइएको छ । ओहायोमा सोमबार राती १२ बजेदेखि लागु हुनेगरी घरभित्रै बस्न आदेश दिइएको छ ।
मिसिगनमा पनि सोमबार राती १२ बजेदेखि घरभित्र बस्न आदेश दिइएको छ भने यो आदेश कम्तीमा तीनहप्ताका लागि जारी रहनेछ । मासाचुसेट्समा मंगलबार दिउसोदेखि लागु हुनेगरी अत्यावश्यकबाहेकका विजनेश बन्द गर्न निर्देशन दिइएको छ । अप्रिल ७ सम्मका लागि दिइएको उक्त आदेशमा १० जनाभन्दा बढी जम्मा हुन समेत प्रतिबन्ध लगाइएको छ ।
लुजियाना, इन्डियाना, इलिनोय, कनेक्टिकट, डेलावर
लुजियानामा सोमबारदेखि अप्रिल १२ सम्मका लागि घरभित्रै बस्न आदेश दिइएको छ । इन्डियानामा मंगलबार रातीदेखि अप्रिल ६ सम्मका लागि घरभित्र बस्न आदेश दिइएको छ ।
इलिनोयमा शनिबार बेलुकादेखि अप्रिल ७ सम्म घरभित्र बस्न आदेश दिइएको छ । तर सर्वसाधारणहरु ग्रोसरी स्टोर, फार्मेसी, अस्पताल, ग्यास स्टेशन लगायतका स्थानमा भने जान सक्नेछन् । डेलावरमा मंगलबार विहान ८ बजेदेखि मे १५ सम्मका लागि घरभित्र बस्न आदेश दिइएको छ ।
कनेक्टिकटमा सोमबार बेलुका ८ बजेदेखि लागु हुनेगरी घरभित्र बस्न आदेश दिइएको छ ।