अमेरिकामा कोरोना संक्रमणको मुख्य केन्द्र बन्यो न्युयोर्क सिटी, १३३९ लाई संक्रमण
प्रकाशित मिति : चैत्र ५, २०७६ बुधबार
अमेरिकामा कोरोना संक्रमणको मुख्य केन्द्र न्युयोर्क सिटी बनेको छ । न्युयोर्क राज्यको डिपार्टमेन्ट हेल्थले केहीबेर अगाडि सार्वजनिक गरेको तथ्यांक अनुशार न्युयोर्क राज्यमा २३८२ जना संक्रमित भएका छन्, जसमध्ये १३३९ न्युयोर्क सिटीभित्र छन् ।
अमेरिकाका अरु राज्यमा न्युयोर्क सिटी एक्लैको तुलनामा कम संक्रमित छन् । वासिंटन राज्यमा संक्रमितको संख्या १०१२ पुगेको छ भने क्यालिफोर्नियामा ६१२ पुगेका छन् । न्युजर्सीमा संक्रमितको संख्या ४२७ पुगेको छ ।
न्युयोर्क राज्यभित्र कहाँ कति संक्रमित ? हेर्नुहोस् डिपार्टमेन्ट अफ हेल्थले केहीबेर अगाडि सार्वजनिक गरेको विवरण ।
न्युयोर्कको अल्बानीमा ३६, डचेजमा २०, मुनरोमा १४, नासुमा १८३, ओरेन्जमा ३२, रकल्याण्डमा ३०, साराटोगमा १४, सफल्कमा ११६ र वेष्टचेस्टरमा ५३८ जनामा संक्रमण पुष्टी भएको छ । न्युयोर्कका ३३ सिटी र काउन्टीमा कोरोना संक्रमण पुष्टी भएको छ । न्युयोर्क राज्यमा कुल ६२ काउन्टी रहेका छन् ।
यसैबीच न्युयोर्कका मेयर बिल ब्लाजिओले केहीदिनमा नै न्युयोर्कसिटीमा संक्रमितको संख्या १० हजार पुग्ने अनुमान गरेका छन् । न्युयोर्क सिटीमा रेष्टुरेण्ट र मनोरञ्जनस्थलहरु पहिले नै बन्द गरिएका छन् । विद्यालयहरु पनि सोमबारदेखि नै बन्द गरिएका छन् ।
अमेरिकाका ५० वटै राज्यमा कोरोना संक्रमण पुष्टी भएको छ । वर्ल्ड ओ मिटरको तथ्यांक अनुशार अमेरिकामा संक्रमितको संख्या ८०२० पुगेको छ । अमेरिकामा आजैमात्र १६०९ जना नयाँ संक्रमित थपिएका छन् भने मृतकको संख्या आजमात्रै १६ थपिंदा १२५ पुगेकोछ ।