न्युयोर्क सिटीमा संकटकाल, सार्वजनिक यातायात बन्द गर्नसक्ने अधिकार
प्रकाशित मिति : फाल्गुन २९, २०७६ बिहीबार
न्युयोर्क सिटीका मेयर बिल डे ब्लाजिओले न्युयोर्क सिटीमा संकटकालको घोषणा गरेका छन् । यसअगाडि गत साता न्युयोर्क राज्यमा गभर्नरले संकटकालको घोषणा गरेका थिए ।
बिहिबार न्युयोर्क सिटीमा पनि संकटकालको घोषणा गर्दै ब्लाजिओले कम्तीमा ६ महिनासम्म संकटको सामना गर्नुपर्ने हुनसक्ने बताएका छन् । न्युयोर्कका बारक्ले सेन्टर र म्याडिसन स्क्वायर गार्डेन जस्ता विशाल कार्यक्रमस्थलहरु महिनौं बन्द हुने अनुमान गरिएको छ ।
न्युयोर्क राज्यमा ३२८ मा कोरोना संक्रमण हुँदा न्युयोर्क सिटीमा संक्रमितको संख्या झण्डै एकसय पुगेको छ । एकसाताभित्र न्युयोर्क सिटीभित्रै संक्रमितको संख्या एकहजार पुग्नसक्ने अनुमान मेयर ब्लाजिओले गरेका छन् ।
संकटकालको घोषणा पनि अब न्युयोर्क सिटीलाई कर्फयु लगाउन पाउने अधिकार प्राप्त भएको छ । त्यस्तै सार्वजनिक यातायात बन्द गर्नसक्ने, बिक्रिमूल्य तय गरेर लागु गर्नसक्ने र रक्सीका बिक्रि वितरण बन्द गर्नसक्ने समेत अधिकार प्राप्त भएको छ ।
न्युयोर्क सिटीमामात्र २४ घण्टाको अवधिमा ४२ वटा नयाँ संक्रमण पुष्टी भएको छ भने १७८० जना क्वारेन्टाइनमा रहेका छन् । २९ जनालाई भने अनिवार्य क्वारेन्टाइनमा राखिएको छ ।
न्युयोर्कमा ५ सय भन्दा बढी व्यक्ति भेला हुन प्रतिबन्ध
न्युयोर्कमा ५ सय भन्दा बढी व्यक्ति एकैठाउँमा भेला हुन प्रतिबन्ध लगाइएको छ । कोरोना संक्रमण फैलिदै गएपछि न्युयोर्कमा यस्तो प्रतिबन्ध लगाइएको हो ।
आजदेखि लागु हुनेगरी न्युयोर्कका गभर्नर एन्ड्रयु कुमोले यस्तो घोषणा गरेका हुन् । यो प्रतिबन्ध कम्तीमा एकमहिनाका लागि लागु हुने जनाइएको छ ।
सानासाना भेलाहरुलाई स्वीकृति दिइनेछ तर ५ सय भन्दा कम व्यक्तिका लागि तोकिएका कार्यक्रमस्थलमा क्षमताको आधाभन्दा बढी जम्मा हुन पाइनेछैन । स्कुल, अस्पताल, यातायत लगायतका क्षेत्रमा भने यस्तो प्रतिबन्ध लागुहुनेछैन ।
यस्तो प्रतिबन्धपछि अब न्युयोर्कमा ठूला कार्यक्रमहरु नहुने भएका छन् । साथै न्युयोर्कका ब्रोडवे शोहरु पनि बन्द हुने भएका छन् । ब्रोडवे शोहरु अप्रिल १२ सम्मका लागि बन्द हुने भएका हुन् ।
न्युयोर्क सिटीका कैयन विद्यालयहरु बन्द गरिएका छन् भने अर्को सातादेखि न्युयोर्कका एलिमेन्टरी स्कुलहरु बन्द गरिने भएका छन् ।
न्युयोर्कका मेट म्युजियम, मेट्रोपोलिटन ओपेरा लगायत पनि कोरोना भाइरसका कारण बन्द हुने भएका छन् ।