न्युयोर्कमा कोरोना संक्रमित ७६, कुन सिटी र काउन्टीमा कति ?
प्रकाशित मिति : फाल्गुन २४, २०७६ शनिबार
न्युयोर्क राज्यमा कोरोना संक्रमितको संख्या ७६ पुगेको छ । आज न्युयोर्कका गभर्नर एन्ड्रयु कुमोले पत्रकार सम्मेलन गरेको यसको जानकारी दिएका हुन् ।
न्युयोर्कको वेस्टचेस्टर काउन्टीमा ५७ जनामा संक्रमण भएको छ भने न्युयोर्क सिटीमामात्र ११ जनामा संक्रमण भएको छ । त्यस्तै रकल्याण्ड काउन्टीमा २, नासु काउन्टीमा ४ र सारागोटा काउन्टीमा ४ जनामा संक्रमण भएको छ ।
न्युयोर्कमा कोरोना संक्रमितको संख्या ७६ पुगेपछि राज्य संकटकालको घोषणा गरिएको छ । न्युयोर्कका गभर्नर एन्ड्रयु कुमोले राज्य संकटकालको घोषणा गरेका हुन् ।
संकटकालको घोषणा गरेपछि कोरोनाबिरुद्ध लड्न अझ धेरै जनशक्ति काममा लगाउन सकिने भएकाले संकटकाल घोषणा गरेको कुमोले जनाएका छन् । तनावमा रहेका स्थानीय स्वास्थ्य विभागलाई सहयोगका लागि संकटलिन अवस्थाको घोषणा गरेपछि राज्यलाई थप शक्ति मिलेको छ ।
अमेरिकाभर कोरोना संक्रमितको संख्या भने ३७७ पुगेको छ । वासिंटन राज्यमा अहिलेसम्म ९१मा संक्रमण भएको छ, जसमध्ये १४ को मृत्यु भइसकेको छ ।
त्यस्तै क्यालिफोर्नियामा ७९ मा संक्रमण भएको छ । जसमध्ये एकजनाको मृत्यु भएको छ । त्यस्तै टेक्सासमा १९ जनामा संक्रमण भएको छ । नेब्रास्कामा १४ जनामा संक्रमण भएको छ ।
युटाहमा २ जनामा कोरोना संक्रमण पुष्टी भएको छ भने मासाचुसेट्समा कोरोना संक्रमितको संख्या ८ पुगेको छ । क्यालिफोर्निया, वासिंटन, टेक्सास, नेब्रास्का र युटाहमा चीनको युहानबाट र डायमण्ड क्रुजसिपबाट उद्दार गरेर ल्याइएकाहरुको समेत तथ्यांक समावेश छ ।
अहिलेसम्म अमेरिकामा १७ जनाको मृत्यु भइसकेको छ । जसमध्ये वासिंटनका १४, क्यालिफोर्नियाका १ र फ्लोरिडाका २ जना रहेका छन् ।
अमेरिकामा कम्तीमा १५ जनाको सफल उपचार भइसकेको छ । जसमा ६ जना क्यालिफोर्नियाका, नेब्रास्कामा ४, इलिनोयमा २, वासिंटनमा १ जना, एरिजोनामा एकजना र विसकन्सिनमा एकजना रहेका छन् ।