राष्ट्रपतिको आलोचना गरेपछि संसदमै कुटिए सांसद
प्रकाशित मिति : फाल्गुन २३, २०७६ शुक्रबार
राष्ट्रपतिको आलोचना गरेपछि टर्कीका एक सांसद संसदमै कुटिएका छन्। संसद बैठकमा विपक्षी दलका सांसदले राष्ट्रपति रिसेप एर्दोगानको आलोचना गरेपछि सांसदहरुबीच झगडा भएको थियो ।
सांसद एन्जिन ओजकोकले राष्ट्रपति एर्दोगानको सिरियाको इडलिबमा गत साता मारिएका ३४ सैनिकको अपमान गरेको भन्दै बैठकै क्रममा कडा आलोचना गरेका थिए ।
ओजकोकले एर्दोगानलाई ‘बेइमान, अज्ञानी, नीच र विश्वासघाती’ भनेका थिए । उनले राष्ट्रपतिबारे बोलेपछि केही सांसदले ओजकोकमाथि मुड्की प्रहार गरेका थिए । केहीले झगडा रोक्न खोजिरहेका थिए, झगडाको क्रममा कतिपय सांसदहरु भुइँमै लडेका टर्कीको टेलिभिजन हाबरर्तुकले जनाएको छ ।
राष्ट्रपतिको आलोचना गर्ने ओजकोक रिपब्लिकन पिपल्स पार्टीका सांसद हुन्। उनले राष्ट्रपतिविरुद्ध लड्न टर्किस जनतालाई बालबालिका पठाउन आग्रहसमेत गरेका थिए ।
टर्कीले सन् २०१८ मा रसियासँग सम्झौतापछि त्यस क्षेत्रबाट सिरियाली फौज हटाउन खोजिरहेको छ र अहिलेसम्म त्यहाँ १२ वटा निगरानी चौकी स्थापना गरेको छ । प्रतिपक्षी दलले भने सिरियाली युद्धलाई लिएर सरकारको आलोचना गर्दै आइरहेको छ ।
यतिबेला टर्कीले सिरियामाथि आक्रमण गर्न सुरु गरेदेखि ५४ जना सैनिक मारिइसकेका छन् भने १० लाखभन्दा बढी मानिस इडलिब छोडेर टर्की पसेका छन्। बिहीबर रसियाका राष्ट्रपति भ्लादिमिर पुटिन र एर्दोगानबीच युद्धविराम गर्ने विषयमा वार्ता पनि हुनेछ ।