सबैभन्दा धेरै कोरोना संक्रमित हुनेमा अमेरिका विश्वमै नवौं, ज्यान गुमाउनेमा पाँचौं
प्रकाशित मिति : फाल्गुन २२, २०७६ बिहीबार
सबैभन्दा धेरैजनामा कोरोना संक्रमण हुनेमा अमेरिका टपटेनमा परेकोछ । अमेरिकामा २१३ जनामा कोरोना संक्रमण पुष्टी भएको छ भने तीमध्ये १२ को मृत्यु भएको छ ।
चीनमा पहिलोपटक देखिएको कोरोनाका सबैभन्दा धेरै बिरामी पनि चीनमा नै छन् । चीनमा अहिलेसम्म ८० हजार ४ सय ३० मा कोरोना संक्रमण भएको छ ।
दोश्रोमा दक्षिण कोरियामा ६ हजार ८८ मा, तेश्रोमा इटलीमा ३ हजार ८ सय ५८ मा, चौथोमा इरानमा ३५१३ मा र पाँचौंमा जर्मनीमा ५४५ मा कोरोना संक्रमण पुष्टी भएको छ । छैठौंमा फ्रान्समा ४२३ मा, सातौंमा जापानमा ३६४ मा र आठौंमा स्पेनमा २८२ मा कोरोना संक्रमण पुष्टी भएको छ ।
नवौंमा अमेरिकामा २१३ मा र दशौंमा स्वीट्जरल्याण्डमा ११८ मा कोरोना संक्रमण भएको छ । कोरोना संक्रमणबाट सबैभन्दा धेरै ज्यान गुमाउनेमा भने अमेरिका पाँचौं नम्बरमा रहेको छ ।
पहिलोमा चीनमा ३०१३, दोश्रोमा इटलीमा १४८, तेश्रोमा इरानमा १०८, चौथोमा साउथ कोरियामा ४० र पाँचौमा अमेरिकामा १२ जनाले ज्यान गुमाएका छन् ।
अहिलेसम्म विश्वमा ३३५६ जनाको कोरोना संक्रमणबाट ज्यान गएको छ । २४ घण्टाको अन्तरालमा मात्र ७१ जनाको ज्यान गएको छ । जसमा सबैभन्दा धेरै इटलीका ४१ जना छन् ।
यसैबीच कोरोना संक्रमणको जोखिममा रहेका न्युयोर्क प्रहरीका ४ जना अफिसर सहित २७७३ जना आइसोलेसनमा रहेका छन् । स्वास्थ्यविभागले यी सबैको अनुगमन गरिरहेको जनाएको छ ।
चीन, इटली, इरान र जापानबाट फर्केका न्युयोर्क प्रहरीका अफिसरहरु त्यहाँबाट फर्केदेखि नै आइसोलेसनमा रहेका छन् । उनीहरु अमेरिका फर्केदेखि नै आफू कार्यरत प्रहरी चौकीमा गएका छैनन् ।
न्युयोर्कको स्वास्थ्य विभागले चीन, इरान, इटली, दक्षिण कोरिया र जापानबाट फर्केकाहरुलाई १४ दिन अनिवार्य आइसोलेसनमा बस्न भनेको छ । आज दिउसो न्युयोर्कका मेयर बिल ब्लाजिओले पत्रकार सम्मेलन गरेर न्युयोर्क सिटीमा कोरोनाबिरुद्ध लड्न भइरहेका प्रयासबारे जानकारी दिएका हुन् ।
ब्लाजिओले न्युयोर्कबासीहरुलाई सामान्य सावधानी अपनाउन सचेत गराएका छन् । हात धुन, खोक्दा वा हाछ्यु गर्दा मुख छोपेर गर्न, बिरामी भएमा घरमै बस्न र लक्षणहरु देखिएमा डाक्टरलाई सम्पर्क गर्न उनले सचेत गराएका छन् ।
उनले न्युयोर्कबासीलाई चिन्तित होइन, सजग रहन आग्रह गरेका छन् । आफूहरुले न्युयोर्कबासीलाई सुरक्षित राख्न हरतरहले प्रयास गरिरहेको उनको भनाई छ ।
अहिलेसम्म न्युयोर्कमा २२ जनामा कोरोना संक्रमण पुष्टी भइसकेको छ । अमेरिकाका राज्यहरुमा संक्रमितको संख्या सबैभन्दा धेरै वासिंटन राज्यमा रहेको छ ।
वासिंटन राज्यमा ७४ जनामा संक्रमण पुष्टी भएको छ भने ती मध्ये ११ जनाको मृत्यु भइसकेको छ । क्यालिफोर्नियामा ६३ जनामा संक्रमण भएको छ भने तीमध्ये एकजनाको मृत्यु भएको छ ।