न्युयोर्कमा कोरोना संक्रमितको संख्या ६, म्यानहटनमा काम गर्ने वकिलका परिवारै बिरामी
प्रकाशित मिति : फाल्गुन २१, २०७६ बुधबार
न्युयोर्कमा कोरोना भाइरस संक्रमितको संख्या ६ पुगेका छ । गभर्नर एन्ड्रयु कुमोले कोरोना भाइरस संक्रमितहरु ६ जना पुगेको पुष्टी गरेका हुन् । सुरुमा एकजना महिला स्वास्थ्यकर्मीमा कोरोना भाइरस संक्रमण पुष्टी भएको थियो, जसले इरानको भ्रमण गरेकी थिइन् । इरानको भ्रमण गरेका उनका पतिमा भने कोरोनाको संक्रमण देखिएको छैन ।
हिजोमात्र न्युयोर्कको म्यानहटनमा काम गर्ने एकजना वकिलमा कोरोना भाइरस संक्रमण पुष्टी गरिएको थियो । अब उनको पूरै परिवारमा कोरोना संक्रमण भएको पुष्टी भएको छ । ती वकिलकी पत्नी, २० बर्षको छोरो र १४ बर्षकी छोरीमामात्र होइन, वकिललाई गाडीमा राखेर अस्पताल लैजाने छिमेकीमा पनि कोरोना संक्रमण पुष्टी भएको छ ।
ती वकिलले न्युयोर्कको म्यानहटनमा सानो ल फर्म संचालन गर्दै आएका थिए, जसमा उनकी पत्नीले पनि काम गर्दै आएकी थिइन् भने छोराले पनि पारालिगलका रुपमा काम गर्दै आएका थिए । ती व्यक्तिको न्युयोर्कको म्यानहटनमा रहेको प्रेस्बेटेरियन अस्पतालमा उपचार भइरहेको छ । उनको अवस्था गम्भिर रहेको स्वास्थ्य विभागले जनाएको छ ।
वेस्टचेस्टर निवासी ५० बर्षका ती वकिल फरबरी २७ मा सुरुमा वेस्टचेस्टरको लरेन्स अस्पतालमा उपचारका लागि गएका थिए । उनले लेवीस एण्ड गार्बज पीसी नामको ल फर्म संचालन गर्दै आएका छन् जुन वान ग्रयाण्ड सेन्ट्रल प्लेसमा रहदै आएको छ ।
उनको वेवसाइट अनुशार उक्त ल फर्ममा वकिल र पारालिगल गरी ७ जना आवद्ध रहेको देखिएको छ । उनकी छोरीले ब्रोंक्समा रहेको सार एकेडेमी एण्ड हाइ स्कुलमा अध्ययन गर्दै आएकी छिन् भने छोराले म्यानहटनको यसिभा युनिभर्सिटीमा अध्ययन गर्दै आएका छन् ।
अहिलेसम्म अमेरिकामा कोरोना भाइरस संक्रमणबाट ९ जनाको मृत्यु भएको छ भने १३६ मा संक्रमण पुष्टी भएको छ । शियाटलमा ३१ जनामा संक्रमण भएकोमा ९ जनाको मृत्यु भएको हो ।
शियाटलपछि सबैभन्दा धेरै क्यालिफोर्नियामा ५२ जनामा संक्रमण पुष्टी भएको छ । टेक्सासमा ११ जना र ने्रबास्कामा १३ जनामा संक्रमण पुष्टी भएको छ ।