भारतीय प्रधानमन्त्री मोदीले नमनाउने भए ‘होली’
प्रकाशित मिति : फाल्गुन २१, २०७६ बुधबार
भारतीय प्रधानमन्त्री नरेन्द्र मोदीले होली नमनाउने भएका छन् । उनले होली सम्बन्धी कुनै पनि समारोहमा सहभागी नहुने निर्णय बुधबार ट्वीटमार्फत सार्वजनिक गरेका हुन् । मोदीले विश्वभर फैलिएको कोरोना भाइरसको महामारीका कारण होली नमनाउने उल्लेख गरेका छन् ।
मोदीले ट्वीटरमा भनेका छन, ‘कोभिड –१९ बाट बच्न विशेषज्ञहरुले सामूहिक भेला नगर्न सुझाव दिएका छन्, यसकारण मैले कुनैपनि होली मिलन कार्यक्रममा सहभागी नहुने निर्णय गरेको छु ।’ भारतमा अहिलेसम्म कोरोना भाइरसको संक्रमण २८ जनामा देखिएको छ । जसमा १६ जना विदेशी र १२ जना भारतीय नागरिक रहेका छन् ।
एक विद्यार्थीमा भाइरसको संक्रमण देखिएपछि नोएडाको एक विद्यालय नै बन्द गरिएको छ । प्रधानमन्त्री मोदीले मंगलबार पत्रकार सम्मेलनमा बोल्दै उत्पन्न परिस्थितिको डटेर सामना गर्न र नआत्तिन भारतीय जनतालाई आग्रह गरेका छन् ।