नेपालबाट फर्केर स्पेन गएका एकजनाको कोरोना संक्रमणबाट मृत्यु
प्रकाशित मिति : फाल्गुन २०, २०७६ मंगलबार
स्पेनमा गत फरबरी १३ मा मृत्यु भएका व्यक्तिको मृत्युको कारण कोराना संक्रमण भएको खुलासा भएको छ । डेलीमेलमा प्रकाशित समाचार अनुशार उनले स्पेन फर्कनुअगाडि नेपालको भ्रमण गरेका थिए ।
भ्यालेन्सियाका स्वास्थ्य अधिकारीहरुले ती व्यक्तिको मृत्यु कोरोना भाइरस संक्रमणबाट भएको पुष्टी गरेका छन् । नेपाल भ्रमणगरेर फर्केपछि ती व्यक्ति बिरामी भएर अस्पतालमा भर्ना भएका थिए ।
अहिलेसम्म ती व्यक्तिको मृत्यु के कारणले भएको थियो भन्नेबारे खुलाइएको थिएन । यो नै कोरोना संक्रमणबाट स्पेनमा भएको पहिलो मृत्यु भएको जनाइएको छ । स्पेनमा कोरोना संक्रमणबाट एकजनाबाहेक अरुको मृत्यु भएको छैन ।
नेपालमा अहिलेसम्म एकजनामामात्र कोरोना संक्रमण भएको र उनको पनि उपचार भइसकेको बताइएको छ । तर नेपालबाट स्पेन फर्केका यी व्यक्तिमा कोरोना संक्रमण देखिनुले नेपालमा कोरोना संक्रमितहरु बजारमा खुलेआम हिडिरहेको हुनसक्ने आशंका बढेको छ ।
अहिलेसम्म स्पेनमा १६५ जनामा संक्रमण देखिएको छ । जसमध्ये ४६ जना म्याड्रिडमा रहेका छन् । ७ जना बिरामीको अवस्था गम्भिर रहेकाले आईसीयुमा राखिएको छ ।
कोरोनाबाट स्पेनमा मृत्यु हुने व्यक्ति नेपालमा कतिदिन भ्रमण गरे र कहाँ कहाँ गए भन्नेबारे केही खुलाइएको छैन । तर उनलाई नेपालमा नै कोरोना संक्रमण भएको आशंका गरिएको छ ।