अमेरिका : कोरोनाबाट दोश्रो मृत्यु, वासिंटनमा मात्र १३ मा संक्रमण, कुल संक्रमित ८४
प्रकाशित मिति : फाल्गुन १८, २०७६ आईतबार
अमेरिकामा कोरोना भाइरसको संक्रमणबाट दोश्रो व्यक्तिको पनि मृत्यु भएको छ । वासिंटन राज्यको किङ काउन्टीमा कोरोना भाइरस संक्रमणबाट ७० कटेका पुरुषको मृत्यु भएको आज शियाटलमा गरिएको पत्रकार सम्मेलनमा जानकारी दिइएको छ । उनलाई किर्कल्याण्डमा रहेको एभरग्रिन हेल्थमा भर्ना गरिएको थियो ।
यसअगाडि वासिंटन राज्यमा नै कोरोना संक्रमणबाट एकजनाको मृत्यु भएको बताइएको थियो । उनी पनि वासिंटन राज्यको किङ काउन्टीकै व्यक्ति रहेका थिए ।
वासिंटन राज्यमा मात्र १३ जनामा कोरोना संक्रमण पुष्टी भइसकेको छ । १३ औं केस आइतबार अबेर सार्वजनिक भएको हो । ४० को उमेरका उनको अवस्था गम्भिर रहेको जनाइएको छ । अमेरिकामा थप १६ मा संक्रमण पुष्टी भएपछि कुल संक्रमितको संख्या ८४ पुगेको छ ।
यसैबीच न्युयोर्कमा पनि कोरोना भाइरस संक्रमणको पुष्टी भएको छ । ३५ बर्ष काटेकी एक महिलामा कोरोना संक्रमण पुष्टी भएको हो । उनमा ईरान भ्रमणको क्रममा संक्रमण भएको जनाईएको छ ।
हाल उनलाई घरमै आइसोलेसनमा राखिएको छ । उनको अवस्था गम्भीर नरहेको जनाईएको छ । अहिलेसम्म अमेरिकामा ८१ जनामा संक्रमण भएको छ भने २ जनाको मृत्यु भएको छ ।
अहिलेसम्म विश्वभर ८९ हजार ७२ मा कोरोना संक्रमण पुष्टी भएको छ भने मृतकको संख्या ३०५३ पुगेको छ । संक्रमित ४५ हजार १ सय २२ को सफल उपचार गरिएको छ ।
यसैबीच अमेरिकामा कोरोना भाइरस संक्रमणको नयाँ जाँच प्रकृया अपनाइने भएको छ । अब चीन लगायत जोखिमपूर्ण देशहरुमा जानेहरुको पनि अमेरिकाबाट प्रस्थान अगाडि जाँच गरिने भएको छ । ती देशहरुबाट अमेरिका आउनासाथ जाँच गरिनेछ ।
यसअगाडि चीनबाट आउने र विगत १४ दिनमा चीनको भ्रमण गरेकाहरुको जाँच गरिएपनि अब चीन र इरानसहित साउथ कोरिया र इटलीबाट आउने र विगत १४ दिनमा ती देशको भ्रमण गरेकाहरुको पनि जाँच गरिनेछ । अब साउथ कोरिया, चीन र आवश्यक परे अन्य युरोपियन देशमा जानेहरुको पनि जाँच गर्ने तयारी भइरहेको अमेरिकी उपराष्ट्रपतिका प्रवक्ताले जनाएका छन् ।
यसैबीच अमेरिकी राष्ट्रपति डोनाल्ड ट्रम्पले हालै इरानको भ्रमण गरेका विदेशी नागरिकलाई पनि अमेरिकामा यात्रा प्रतिबन्ध लगाएका छन् । अमेरिकाले आफ्ना नागरिकलाई इटली र साउथ कोरियाको भ्रमण नगर्न चेतावनी दिएको छ । मेक्सिकोसँगको सिमाक्षेत्रमा पनि नयाँ प्रतिबन्ध लगाउने योजनामा अमेरिकी अधिकारीहरु रहेका छन् ।
अमेरिकाको वासिंटन राज्यमा कोरोनाको संक्रमणबाट एकजनाको मृत्यु भएपछि थाइल्याण्ड र अष्ट्रेलियामा पनि कोरोना संक्रमणबाट पहिलो मृत्युका खबर आएका छन् । अमेरिकाको वासिंटनमा शनिबार कोरोना भाइरसको संक्रमणबाट एकजनाको मृत्यु भएपछि त्यहाँ राज्य संकटकाल घोषणा गरिएको छ ।
थाइल्याण्डमा कोरोना संक्रमणबाट पहिलो मृत्युको खबर आएको छ । थाइल्याण्डमा ज्यान गुमाउने व्यक्ति ३५ बर्षका रहेको जनाइएको छ । थाइल्याण्डमा आहिलेसम्म ४२ जनामा कोरोना संक्रमण पुष्टी भएको छ ।
अष्ट्रेलियामा पनि कोरोना भाइरसको संक्रमणबाट पहिलो मृत्यु भएको छ । जापानको क्रुजसिपबाट उद्दार गरिएका ७८ बर्षका व्यक्तिको मृत्यु भएको जनाइएको छ । अष्ट्रेलियामा अहिलेसम्म २९ जनामा कोरोना संक्रमण भएको छ ।