कोरोना भाइरसबाट अमेरिकामा पहिलो मृत्यु, ६८ जनामा संक्रमण
प्रकाशित मिति : फाल्गुन १७, २०७६ शनिबार
कोरोना भाइरसको संक्रमणबाट अमेरिकामा पनि एकजनाको मृत्यु भएको छ । अमेरिकामा कोरोना भाइरस संक्रमणबाट यो नै पहिलो मृत्यु हो ।
अमेरिकाको वासिंटन राज्य (वासिंटन डिसी होइन) मा एकजनाको मृत्यु भएको छ । अहिलेसम्म अमेरिकामा ६६ जनामा कोरोना भाइरसको संक्रमण पुष्टी भएको छ । जसमध्ये ९ जनाको सफल उपचार भइसकेको छ ।
शुक्रबार अमेरिकाको वासिंटन राज्यका साथमा ओरेगन र क्यालिफोर्नियामा पनि कोरोना संक्रमणका थप केसहरु पुष्टी भएका थिए । अमेरिकामा कम्तीमा ४ जना संक्रमितहरुको कुनै यात्रा इतिहास नरहेको र संक्रमितसँग सम्पर्कमा रहेको समेत नपाइएको जनाइएको छ ।
अहिलेम्म विश्वभर ८६ हजार भन्दा बढीमा कोरोनाको संक्रमण पुष्टी भइसकेको छ भने २९४२ जनाको मृत्यु भइसकेको छ । चीनमामात्र अहिलेसम्म २८३५ जनाको मृत्यु भएको छ ।
कोरोनाबाट दक्षिण कोरियामा १७, इटलीमा २९ र इरानमा ४३ जनाको मृत्यु भइसकेको छ । दक्षिण कोरियामा संक्रमितको संख्या ३१५० नाघेको छ । इरानमा ५९३ जनामा संक्रमण भइसकेको छ ।