साउथ कोरियामा कोरोना संक्रमितको संख्या ४३०, इटलीमा ६२ मा संक्रमणपछि १० वटा गाउँ शटडाउन
प्रकाशित मिति : फाल्गुन १०, २०७६ शनिबार
साउथ कोरियामा कारोना भाइरसबाट संक्रमित हुनेहरुको संख्या ४३० नाघेको छ । २४ घण्टाको अवधिमा २२० जनामा कोरोना संक्रमणको पुष्टी भएपछि संक्रमितका संख्या ह्वात्तै बढेको हो ।
अहिलेसम्म चीनमामात्र ७६ हजार २ सय ८८ मा कोरोना संक्रमण पुष्टी भइसकेको छ । विश्वब्यापी रुपमा भने कोरोना संक्रमितको संख्या ७७ हजार ७ सय नाघेको छ । कोरोनाको संक्रमणबाट अहिलेसम्म २४५८ जनाको मृत्यु भइसकेको छ जसमध्ये १७ मृत्यु चीनबाहिर भएको हो ।
इटलीमा कोरोना भाइरस संक्रमितको संख्या ६२ पुगेपछि १० वटा गाउँहरु हटडाउन गरिएको छ । इटलीमा ७८ बर्षका एकबृद्ध र ७७ बर्षकी एक बृद्धाको कोरोना संक्रमणबाट मृत्यु भइसकेको छ । इटलीमा कोरोनाबाट सबैभन्दा धेरै प्रभावित गाउँहरु शनिबारदेखि शटडाउन गरिएको छ । ती गाउँहरुमा ट्रेनहरु समेत नरोकिने भएको छ ।
इरानमा कोरोना भाइरसको संक्रमणबाट ५ जनाको मृत्यु भएपछि कुवेतले इरानमा रहेका आफ्ना ७ सय जना नागरिकलाई विमान चार्टड गरेर फिर्ता लैजाने भएको छ । इजरायलले विदेशी पर्यटकमाथि प्रवेशमा कडाई गरेको छ । इजरायलले विगत १४ दिनमा साउथ कोरिया र जापान गएकाहरुलाई समेत प्रवेशमा रोक लगाएको छ ।
अमेरिकाले आफ्ना नागरिकलाई साउथ कोरियाको भ्रमणमा जाँदा सावधानी अपनाउन चेतावनी दिएको छ । अमेरिकाको विदेश मन्त्रालयले यात्रा चेतावनी जारी गर्दै सावधानी अपनाउन भनेको हो ।
यसैबीच जापानमा कोरोना संक्रमितको संख्या ७३८ पुगेको छ भने ३ जनाको मृत्यु भएको छ । अमेरिकामा ३५ जनामा कोरोना संक्रमण पुष्टी भइसकेको छ ।