अमेरिकामा ४२ राज्यमा ४६७ जनामा कोरोना भाइरस परीक्षण
प्रकाशित मिति : फाल्गुन ५, २०७६ सोमबार
अमेरिकामा अहिलेसम्म ४६७ जनामा कोरोना भाइरस भए नभएको परीक्षण गरिएको छ । अमेरिकाका विभिन्न ४२ राज्यमा यस्तो परीक्षण गरिएको रोग नियन्त्रण तथा रोकथामका लागि अमेरिकी केन्द्रले जनाएको छ ।
परीक्षण गरिएकाहरुमध्ये १५ जनामा कोरोना भाइरसको संक्रमण पाइएको छ । ३९२ जनामा भने कोरोनाको संक्रमण देखिएको छैन । त्यस्तै ६० जनाको रिपोर्ट आउन भने बाँकी नै रहेको छ ।
जापानको क्रुजसिपबाट उद्दार गरिएका १४ जना अमेरिकनमा कोरोना भाइरसको संक्रमण पुष्टी भएको छ । जुन अमेरिकाभित्र भएका परीक्षणभन्दा बेग्लै हो । उक्त क्रुजसिपमा ३५६ मा कोरोना भाइरस संक्रमण भएको पुष्टी भएको थियो । क्रुजसिपमा झण्डै ४ सय अमेरिकनहरु रहेका थिए ।
अमेरिकामा संक्रमण पुष्टी भएका सबैभन्दा धेरै ८ जना क्यालिफोर्नियामा रहेका छन् भने इलिनोयमा २ जना रहेका छन् । टेक्सास, मासाचुसेट्स, वासिंटन राज्य, एरिजोना र विसकन्सिमा एकएकजनामा संक्रमण भएको छ ।
अहिलेसम्म विश्वभर ७१ हजारमा कोरोना भाइरस संक्रमणको पुष्टी भएको छ । मृतकको संख्या १७७५ नाघेको छ ।