क्यालिफोर्नियामा घरभित्रै १४ सय बढी गैरकानुनी गाँजाका बोट, प्रहरीबाट कब्जा
प्रकाशित मिति : फाल्गुन ५, २०७६ सोमबार
अमेरिकाको उत्तरी क्यालिफोर्नियामा एउटा घरभित्रै रोपिएका १४ सय बढी गाँजाका बोटहरु प्रहरीले फेला पारेको छ । क्यालिफोर्नियाको वेष्ट प्वाइन्टमा गैर कानुनी रुपमा गाँजा खेती गर्ने व्यक्तिलाई प्रहरीले पक्राउ गरेको छ भने सबै गाँजाका बोटहरु नियन्त्रणमा लिएको छ ।
३६ बर्षका जोंग झीलाई गैरकानुनी गाँजा उत्पादन र लागु औषध कारोबारको अभियोग लगाइएको छ । उनलाई १ लाख डलर धरौटी तोकेर स्थानीय जेलमा राखिएको छ ।
एउटा ठूलो भवनभित्र पूरै गाँजा खेति गरिएको थियो भने गाँजा खेतीका लागि खतरनाक रुपमा विद्युतीय रुपान्तरण गरिएो थियो । बस्नका लागि अत्यन्तै असुरक्षित रहेको भवनमा गाँजा खेती गरिएको थियो ।
अमेरिकामा कतिपय राज्यहरुमा गाँजा उत्पादन र बिक्रि कानुनी भएतापनि त्यसको लाइसेन्सको प्रकृया जटिल रहेको छ । विना लाइसेन्स गाँजा उत्पादन गर्नु गैरकानुनी रहेकाले त्यसरी गाँजा उत्पादन गरेमा कडा सजायको व्यवस्था रहेको छ ।
कतिपय राज्यमा औषधीको रुपमा मात्र गाँजाको प्रयोग बैध रहेको छ भने कतिपय राज्यमा गाँजा सेवनलाई नै कानुनी बनाइएको छ । यद्यपी अमेरिकाको संघीय कानुन अनुशार भने गाँजा सेवनलाई अझै पनि गैरकानुनी मानिन्छ । यदि कुनै व्यक्तिले गाँजा सेवन गरेको पाइएमा उसलाई असल नैतिक चरित्र नभएको ठहर गरेर अमेरिकी नागरिकताबाट वञ्चित गर्नसकिने प्रावधान समेत छ ।