ट्रम्पको रिसोर्ट छिर्न २ लाख डलरको सदस्यता लिनुपर्ने, अनाधिकृत छिर्नेलाई ६ महिना जेल
प्रकाशित मिति : फाल्गुन २, २०७६ शुक्रबार
अमेरिकी राष्ट्रपति डोनाल्ड ट्रम्पको फ्लोरिडामा रहेको मार ए लागो रिसोर्टमा घुसेर तस्वीर खिच्न खोज्ने एकजना चिनिया नागरिकलाई ६ महिनाको जेल सजाय सुनाइएको छ । आज लु जिंघलाई त्यहाँको अदालतले जेल सजाय सुनाएको हो ।
गत डिसेम्बरमा उनी अनाधिकृत रुपमा रिसोर्टमा छिरेकी थिइन् । सुरक्षागार्डले उनलाई बाहिर जान भनेपनि उनले नमानेर तस्वीर खिचेकी थिइन् । पछि उनलाई त्यहाँको प्रहरीले पक्राउ गरेको थियो ।
डिसेम्बर १८ देखि हिराशतमा राखिएकोमा उनलाई डिसेम्बरदेखि फरबरी १४ सम्मको ५९ दिनको उनलाई क्रेडिट दिइने भएको छ । जस अनुशार उनले अब ४ महिना जेलमा बिताउनुपर्ने भएको छ ।
चिनिया नागरिक लु जिंघले आफूलाई अमेरिकी कानुनबारे थाहा नभएकाले त्यस्तो हुन गएको भन्दै न्यायाधिससमक्ष कम सजायको माग गर्दै याचना गरेकी थिइन् । उनको यो पहिलो अपराध भएको र आफू अन्जानमा गल्ती गरेको भन्दै उनले याचना गरेकी थिइन् ।
सन् २०१९ मा मार ए लागो रिसोर्टभित्र अनाधिकृत रुपमा छिर्ने यी दोश्रो चाइनिज हुन् । यसअगाडि मार्चमा पनि अर्का एकजना चाइजिन यसरी नै छिर्दा उनलाई ८ महिनाको जेल सजाय दिइएको थियो ।
ट्रम्पको मार ए लागो रिसोर्टमा प्रवेशका लागि सदस्यता लिन जरुरी हुन्छ । सदस्यता शुल्क २ लाख डलर रहेको छ भने बार्षिक रुपमा १५ हजार डलर तिर्नुपर्छ । यदि रिसोर्टमा रात विताउन चाहेको खण्डमा एकरातको २ हजार डलर थप तिर्नुपर्छ ।
हाल यो रिसोर्टका सदस्यहरु ५ सयको हाराहारीमा रहेका छन् । सदस्यता लिएको व्यक्तिले साथमा दुईजनासम्म पाहुनाहरु रिसोर्टमा लैजानसक्ने व्यवस्था रहेको छ ।
यदि राष्ट्रपति ट्रम्प र परिवारका सदस्यहरु रिसोर्टमा रहेको खण्डमा त्यहाँ जाने सदस्यहरुले पनि सेक्रेट सर्भिसको चेकप्वाइन्ट पार गरेर जानुपर्छ । साथमा सानातिना हातहतियार, चक्कु वा सुरक्षा खतरा हुने सामाग्रीहरु लैजान पाइदैन ।
रिसोर्टमा डोनाल्ड ट्रम्पले बेलाबेलामा पार्टी समेत गर्छन् । नयाँ बर्षको यस्तै पार्टीमा रिसोर्टका सदस्यता लिएकाहरुका लागि ६ सय र सदस्यता लिएकाहरुका पाहुनाहरुलाई ७५० डलर शुल्क तोकिएको थियो ।
सदस्यता नलिएकाहरुले पनि विवाह, बर्थडे पार्टीहरु गर्न सक्छन् । तर त्यसको लागि महँगो शुल्क तिर्नुपर्छ । पार्टीको साइज र हल अनुशार यसको शुल्क निर्धारण हुन्छ ।
मार ए लागो रिसोर्टभित्र निजी समुन्दी तट, विशिष्ट श्रेणीका स्पा, टेनिस कोर्ट, गल्फ कोर्स लगायत रहेका छन् । यो सम्पत्ति डोनाल्ड ट्रम्पले सन् १९८५ मा १० मिलियन डलरमा किनेका थिए ।