कोरोना भाइरसको आशंकामा अस्पतालमा भर्ना दुई युवती पर्खाल नाघेर भागे
प्रकाशित मिति : फाल्गुन १, २०७६ बिहीबार
कोरोना भाइरसको आशंकामा रसियाको अस्पतालमा भर्ना दुई युवती पर्खाल नाघेर भागेका छन् । उनीहरुमध्ये एकजना अस्पतालको पर्खाल नाघेर भागेको जनाइएको छ ।
दुबै महिलाहरुलाई चीनबाट फर्केपछि अस्पताल भर्ना गरिएको थियो । उनीहरु हुबेइबाट १ हजार माइल टाढाको हैनानको भ्रमण गरेर फर्केका थिए ।
कोरोना भाइरसको संक्रमण नेगेटिभ आएपछि पनि उनीहरुलाई थप १४ दिनसम्म अस्पतालमा रहन भनिएपछि उनीहरु भागेका छन् । अहिलेसम्म विश्वभर ६० हजारभन्दा धेरैमा कोरोनाको संक्रमण देखिएको छ भने १३५७ जनाको मृत्यु भएको छ ।
यसैबीच कोरोना भाइरस संक्रमणको आशंकामा टेकु अस्पताल पुगेका साउदी अरबका नागरिक पनि भागेका छन् । चीनको बाटो हुँदै नेपाल आएका उनी रुघाखोकी र ज्वरो आएपछि टेकुस्थित शुक्रराज ट्रपिकल तथा सरुवा रोग अस्पतालमा जाँच गर्न पुगेका थिए ।
सामान्य चेकजाँच गर्ने क्रममा उनलाई कोरोनाको आशंका भएपछि अस्पतालले निगरानीमा राख्ने निर्णय गरेको थियो । तर, निगरानीमा राख्ने तयारी गर्दागर्दै उनी भागेका हुन् ।
त्यस्तै धनगढीका एक युवालाई कोरोना भाइरसको आशंकामा सेती प्रादेशिक अस्पताल भर्ना गरिएको छ । हालै चीनबाट नेपाल फर्किएका उनीलाई ज्वरो आउने तथा घाटी दुख्ने समस्या देखिएपछि कोरोना भाइरसको आशंकामा अस्पताल भर्ना गरिएको हो ।