ओस्कार अवार्ड : उत्कृष्ट चलचित्रको अवार्ड साउथ कोरियन चलचित्र प्यारासाइटलाई
प्रकाशित मिति : माघ २६, २०७६ आईतबार
आज अमेरिकाको लस एन्जलसमा एक कार्यक्रमको आयोजना गरी ९२ औं ओस्कार अवार्ड विजेताहरुको घोषणा गरिएको छ । एकेडेमी अवार्डका रुपमा चर्चित ओस्कार अवार्डमा विभिन्न विधामा उत्कृष्टको घोषणा गरिएको छ ।
यसपटकको ओस्कारमा उत्कृष्ट चलचित्रको अवार्ड साउथ कोरियन चलचित्र प्यारासाइटले जितेको छ ।
उत्कृष्ट अभिनेताको अवार्ड जोकरबाट जोकिन फीनिक्स ले जितेका छन् । उत्कृष्ट अभिनेतृको अवार्ड चलचित्र जुडीबाट रेनी जेलवेगरले जितेकी छिन् ।
उत्कृष्ट निर्देशकको अवार्ड प्यारासाइटका बोंग जोन होलाई प्रदान गरिएको छ । उत्कृष्ट अन्तर्राष्ट्रिय चलचित्रको अवार्ड पनि साउथ कोरियाको प्यारासाइटलाई प्रदान गरिएको छ ।
उत्कृष्ट आवाज सम्पादनको अवार्ड फोर्ड भर्सेस फरारी, उत्कृष्ट सहअभिनेतृको अवार्ड म्यारिज स्टोरीबाट लाउरा डर्न, उत्कृष्ट सहअभिनेताको अवार्ड वान्स अपन अ टाइम इन हलिउडबाट ब्राड पिटले प्राप्त गरेका छन् । त्यस्तै एनिमेटेड फिचर फिल्म टोय स्टोरी ४, एनिमेटेड सर्ट फिल्म हेयर लभ, बेस्ट ओरिजिनल स्क्रीनप्ले प्यारासाइटबाट बोंग जोन हो र बेस्ट एडप्टेड स्क्रीनप्ले अवार्ड जाजो र्याबिटबाट टाइका वाईटीटीले प्राप्त गरेका छन् ।
त्यस्तै लाइभ एक्सन सर्ट फिल्मको अवार्ड द नेवर्स वीन्डो, बेस्ट प्रोडक्सन डिजाइन वान्स अपन अ टाइम इन हलिउड र बेस्ट कस्ट्युम डिजाइनको अवार्ड लिटल वुमनबाट ज्याकलिन डुरनले प्राप्त गरेका छन् । डकुमेन्ट्री फिचर अवार्ड अमेरिकन फ्याक्टरीले र डकुमेन्ट्री सर्ट फिचर अवार्ड लर्निंग टु स्केटबोर्ड इन अ वारजोनले प्राप्त गरेका छन् ।
त्यस्तै १९१७ले उत्कृष्ट सिनेमेटोग्राफी र उत्कृष्ट साउण्ड मिक्सिंग अवार्ड जितेको छ । भिजुअल इफेक्टको अवार्ड पनि १९१७ ले जितेको छ । उत्कृष्ट फिल्म सम्पादनको अवार्ड पनि फोर्ड भर्सेस फरारीले जितेको छ । उत्कृष्ट मेकअप एण्ड हेयर स्टायलको अवार्ड बमशेलले जितेको छ ।
म्युजिकमा ओरिजिनल स्कोर अवार्ड जोकरले प्राप्त गरेको छ । म्युजिकमा ओरिजिनल गीतको अवार्ड रकेटम्यानबाट लभ मी अगेनले प्राप्त गरेको छ ।