विश्वका धनी बिल गेट्स दम्पत्तिबाट कोरोना भाइरसबिरुद्ध लड्न १० करोड अमेरिकी डलर सहयोग
प्रकाशित मिति : माघ २३, २०७६ बिहीबार
घातक कोरोना भाइरसको संक्रमण विश्वब्यापी फैलिदै गएपछि राहतका लागि विश्वकै धनी बिल गेट्सले १० करोड अमेरिकी डलर सहयोग गर्ने भएका छन् । यो रकम भाइरसबिरुद्धको भ्याक्सिन पत्ता लगाउन, भाइरसको फैलावट रोक्न, बिरामीको पहिचान र उपचार प्रभावकारी बनाउन प्रयोग गरिने भएको छ । बिल मेलिन्दा फाउण्डेशनको तर्फबाट उक्त सहयोग प्रदान गरिने भएको हो ।
यसैबीच चीनमा घातक कोरोना भाइरस संक्रमणको खुलासा गर्ने युहानका डाक्टरको कोरोना भाइरसकै कारण मृत्यु भएको छ । उनले गत डिसेम्बरमा सार्सजस्तै खतरनाक रोग आउन लागेको भन्दै सर्वसाधारणहरुलाई चेतावनी दिएका थिए ।
ली वेनलियांग नाममा ती डाक्टरलाई सामाजिक भड्वाउमा लागेको र अफवाह फैलाएको आरोपमा प्रहरीले बोलाएर एउटा काजगमा हस्ताक्षर गराएको थियो । कोरोनाभाइरस संक्रमित बिरामीबाट उनमा भाइरसको संक्रमण भएपछि उनी जनवरी १२ मा अस्पताल भर्ना भएका थिए ।
फरबरी १ मा उनमा कोरोना भाइरसको संक्रमण भएको पुष्टी भएको थियो । अहिले उनको मृत्यु भइसकेको विभिन्न संचारमाध्यमहरुले जनाएका छन् ।
कोरोना भाइरसबाट अहिलेसम्म झण्डै ३० हजार सक्रमित भइसकेका छन् भने मृतकको संख्या ५६५ नाघेको छ । भर्खरै जन्मेको ३० घण्टाको बच्चामा समेत कोरोना भाइरस संक्रमण हुँदा मृत्यु भएको छ ।
अमेरिकामा अहिलेसम्म १२ जनामा कोरोना भाइरस संक्रमणको पुष्टी भइसकेको छ । बेलायत र जर्मनीमा पनि संक्रमणका थप बिरामीहरु भेटिएका छन् ।