स्टेट अफ द युनियन : ट्रम्पले मिलाएनन् हात, पेलोसीले च्यातिन् ट्रम्पको भाषणको प्रति
प्रकाशित मिति : माघ २२, २०७६ बुधबार
अमेरिकी राष्ट्रपति डोनाल्ड ट्रम्पले संसदको संयुक्त सभाबाट राष्ट्रका नाममा गरेको सम्बोधनका क्रममा ट्रम्प र हाउस स्पीकर न्यान्सी पेलोसीबीच बोलचाल हुने अपेक्षा गरिएको थियो । तर सम्बोधन गर्नुअगाडि हाउस स्पीकर न्यान्सी पेलोसीले हात मिलाउन दिएकोमा अस्वीकार गरेका छन् ।
भाषणको कागजी प्रति पेलोसीलाई दिएपछि पेलोसीले मिलाउनका लागि हात आगाडि सारेकी थिइन् । तर ट्रम्पले हात मिलाउन अस्वीकार गरेर सम्बोधन गर्नपट्टी लागेका थिए । यो अमेरिकी राष्ट्रपतिको बार्षिक सम्बोधन हो, जसलाई स्टेट अफ द युनियनका रुपमा चिनिन्छ ।
सम्बोधन सकिएसकेपछि पेलोसीले ट्रम्पको भाषणको कागजी प्रति क्यामेराकै अगाडि च्यातिदिइन् । उनले ट्रम्पको भाषण झुठको घोषणापत्र भएकाले च्यातेको बताइन् । ट्रम्पले पेलोसीसँग हात मिलाउन अस्वीकार गरेपछि पेलोसीले ट्रम्पको भाषणको प्रति च्यातेको विश्लेषण गरिएको छ ।
राष्ट्रपति ट्रम्पले स्टेट अफ युनियन सम्बोधनका क्रममा के भने भन्ने विषयले भन्दा संचारमाध्यममा हात नमिलाएको र भाषणको प्रति च्यातेको विषयले चर्चा पाइरहेको छ । हात मिलाएको प्रसंगबारे पेलोसीले ट्वीट गर्दै डेमोक्र्याट्सहरुले मित्रताको हात बढाउन नछाड्ने बताएकी छिन् ।
राष्ट्रपति ट्रम्पको यो तेश्रो स्टेट अफ द युनियन सम्बोधन थियो, जसलाई संचारमाध्यमहरुबाट ठूलो कभरेज पाएको आगामी चुनाव अगाडिको ट्रम्पको मुख्य प्लेटफर्मका रुपमा व्याख्या गरिएको छ । यदि आगामी निर्वाचनमा राष्ट्रपतिमा निर्वाचित नभएको खण्डमा यो ट्रम्पको अन्तिम स्टेट अफ द युनियन सम्बोधन हुनेछ ।
सन् १९९९ मा बिल क्लिन्टनकै जस्तो सिनेटमा महाअभियोग परीक्षा चलिरहँदा ट्रम्पको स्टेट अफ युनियन सम्बोधन भएको हो । झण्डै एक दर्जन हाउस डेमोक्रेटिक सांसदहरुले सम्बोधन बहिस्कार गरेका थिए ।