कोरोना भाइरस संक्रमित यात्रु चढाउने उबर चालकसहित २४० यात्रुको एकाउन्ट सस्पेण्ड
प्रकाशित मिति : माघ २१, २०७६ मंगलबार
उबरले २४० यात्रुसहित कोरोना भाइरस संक्रमित यात्रुलाई चढाउने दुईजना उबर चालकको एकाउन्ट सस्पेण्ड गरेको छ । अमेरिकाबाट मेक्सिको घुम्न गएका एकजना चिनिया मुलका व्यक्तिलाई गाडीमा चढाएका २ जना उबर चालकको एकाउन्ट सस्पेण्ड गरिएको उबरले जनाएको छ ।
गत जनवरी २० मा अमेरिकाको लस एन्जलसबाट मेक्सिको सिटी गएका ती यात्रु त्यहाँ विभिन्न स्थानमा घुमेका थिए । घुम्ने क्रममा ती व्यक्तिले दुईवटा उबर चढेको र अमेरिका फर्केर परीक्षण गर्दा उनमा कोरोना भाइरसको संक्रमण पुष्टी भएको थियो ।
ती व्यक्ति चढेको गाडीमा चढेका अरु २४० जना यात्रुको पनि उबर एकाउन्ट सस्पेण्ड गरिएको छ । उनीहरुले अरु उबरमा चढेर कोरोना भाइरस नफैलाउन् भन्ने उद्देश्यले एकाउन्ट सस्पेण्ड गरिएको उबरले जनाएको छ ।
यद्यपी मेक्सिकोबाट अमेरिका फर्केका एकजनामाबाहेक अरुमा भने कोरोना भाइरसको संक्रमण देखिएको पुष्टी भएको छैन । प्रभावित यात्रुहरुले भने कम्तीमा २ हप्तासम्म उबर एकाउन्ट प्रयोग गर्न नपाउने भएका छन् ।
लस एन्जलसबाट २० जनवरीमा मेक्सिको गएका चिनिया मुलका ती नागरिक जनवरी २१ मा बिरामी भएका थिए । त्यसपछि उनी भोलिपल्ट उबर चढेर विमानस्थलमा आएका थिए ।
ती संक्रमित बिरामी मेक्सिको सिटीमा रहेको हिल्टन होटलमा बसेका थिए । मेक्सिकोका अधिकारीहरु उक्त होटलमा समेत पुगेर होटलका कर्मचारीमा संक्रमण भए नभएको जाँच गरेका थिए ।