भोलिदेखि युरोपियन युनियनमा रहनेछैन बेलायत
प्रकाशित मिति : माघ १६, २०७६ बिहीबार
बेलायतको स्थानीय समय अनुशार शुक्रबार राती ११ बजेपछि बेलायत युरोपियन युनियनमा रहनेछैन । अब युरोपियन युनियनका सदस्य राष्ट्रहरुको संख्या जम्मा २७ हुने भएको छ ।
अहिलेसम्म युरोपियन युनियन बेलायतसहितका २८ राष्ट्रको राजनीतिक र आर्थिक मञ्च हो । यीदेशहरुबीच कुनै अतिरिक्त शुल्कविना नै मालसामानको ओसारपसार गर्न सकिन्छ । त्यस्तै युरोपियन युनियनभित्रका देशका नागरिकले कामका लागि कुनै पनि देश छनौट गर्न सक्छन् ।
बेलायत सन् १९७३ मा युरोपियन युनियनमा समावेश भएको छ भने युरोपियन युनियनबाट हट्ने पहिलो राष्ट्र हुने भएको छ । बेलायत युरोपियन युनियबाट जनवरी ३१ मा हटिसकेपछि पनि थप सहमतिका लागि वार्ताहरु हुनेछन् । बेलायत युरोपियन युनियनबाट हटेपछि दुबै पक्षले भविश्यको सम्बन्धबारे मार्गदर्शन बनाउनेछन् ।
बेलायत युरोपियन युनियनबाट बाहिरिएको भोलिपल्टदेखि नै संक्रमणकालको सुरुवात हुनेछ, जुन सन् २०२० को डिसेम्बर ३१ सम्म रहनेछ । यो ११ महिनाको अवधिभर बेलायत र युरोपियन युनियनबीच ब्यापारिक सम्बन्ध उस्तै रहनेछ भने बेलायतले युरोपियन युनियनका सबै नियमहरु पालना गर्नेछ ।
युरोपियन युनियनको संसदले पनि बेलायत युरोपियन युनियनबाट बाहिरिनेसम्बन्धी सम्झौता अनुमोदन गरेको छ। ब्रसेल्सस्थित इयु संसदमा बुधबार भएको मतदानमा ६२१ सांसदले बहिर्गमन सम्झौता अनुमोदनको पक्षमा मत दिएका हुन्।
ब्रिटिस संसदको तल्लो सदन हाउस अफ कमन्सले पनि ब्रेक्जिट सम्झौता पारित गरिसकेको छ।