कोरोना भाइरसबाट १७० को मृत्युपछि विश्व स्वास्थ्य संकटकाल घोषणा
प्रकाशित मिति : माघ १६, २०७६ बिहीबार
कोरोना भाइरसबाट १७० को मृत्युपछि विश्व स्वास्थ्य संगठनले अन्तर्राष्ट्रिय चासोको स्वास्थ्य संकटकाल घोषणा गरेको छ । गतसातामात्र विश्व स्वास्थ्य संगठनले कोरोना भाइरसको संक्रमण संकटकाल नै घोषणा गर्ने अवस्थामा नरहेको बताएको थियो ।
तर व्यक्तिबाट व्यक्तिमा भाइरस संक्रमणको पुष्टी भएपछि र चीनबाहिर पनि संक्रमण बढ्दै गएपछि संकटकालको घोषणा गरिएको हो । चीनमा जे भइरहेको छ त्यसकारणमात्र नभई अरु देशहरुमा भइरहेको संक्रमणका कारण संकटकालको घोषणा गर्नुपरेको विश्व स्वास्थ्य संगठनका महानिर्देशकले बताएका छन् ।
विश्व स्वास्थ्य संगठनले अन्तर्राष्ट्रिय चासोको स्वास्थ्य संकटकाललाई असामान्य अवस्थाका रुपमा लिने गरेको छ । रोगको अन्तर्राष्ट्रियरुपमा नै संक्रमण फैलिदै गएको अवस्थामामात्र यस्तो संकटकालको घोषणा गरिने प्रावधान रहेको छ । यसअगाडि इबोला, जिका र एचवान एनवान भाइरस संक्रमणका बेला पनि यस्तो संकटकाल घोषणा गरिएको थियो ।
कोरोना भाइरसको संक्रमणबाट चीनमामात्र १ सय ७० भन्दा धेरैको मृत्यु भएको छ भने ८१ सय भन्दा धेरैमा संक्रमण पुष्टी भएको छ । विश्वभर ८ हजार २ सय ५४ मा कोरोनाको संक्रमण देखिएको छ जुन सार्सको भन्दा पनि धेरै हो । सार्सको संक्रमण जम्मा ८ हजार ९८ जनामा पुष्टी भएको थियो । तर सार्सबाट भने ७७४ जनाको ज्यान गएको थियो ।
कोरोनाको संक्रमण भारत र फिलिपिन्समा पनि देखिइसकेको छ । अहिलेसम्म २० भन्दा धेरै देशमा यसको संक्रमण पुष्टी भएको छ ।
कोरोनाको संक्रणपछि अमेरिका, बेलायत जापान लगायत अन्यदेशले इपिसेन्टर युहानबाट आफ्ना देशका नागरिकहरुलाई बाहिर निकालिसकेका छन् ।