नेविसंघकी पूर्व नेतृ पार्वती अधिकारीको अष्ट्रियामा निधन
प्रकाशित मिति : माघ १४, २०७६ मंगलबार
नेपाल विद्यार्थी संघकी पूर्व नेतृ तथा अष्ट्रियाको नेपाली समाजमा सक्रिय सामाजिक अभियन्ता पार्वती अधिकारीको ४४ बर्षको उमेरमा अष्ट्रियामा नै असामयिक निधन भएको छ । डाक्टर अच्युत अधिकारीलाई उद्धृत गर्दै नेपलिज डायस्पोराले प्रकाशित गरेको समाचार अनुशार बिगत केहि बर्षदेखि क्यान्सरसंग लड्दै आएकी अधिकारीको क्यान्सर कै कारण निधन भएको हो ।
अष्ट्रियाको नेपाली समाजमा उल्लेख्य काम गरेकी अधिकारीको निधनबाट अष्ट्रियाको नेपाली समाज शोकमा डुबेको छ ।
अष्ट्रियामा जर्मनी भाषामा उच्च शिक्षा हासिल गरेकी अधिकारीले वोकु विश्वविद्यालयमा वायो टेक्नोलोजीमा पनि स्नातकोत्तर गरेकी थिइन् । उनले, श्रीमान अरुण शर्मा र नेपालीहरूले बिषेश पहल गरेपछि युराेपमै पहिलो पटक माध्यमिक तहसम्म नेपाली भाषा पढाउन अष्ट्रिया सरकारले मान्यता दिएकाे थियाे ।
आफ्नै नेतृत्वमा आफु बस्ने क्षेत्रको एउटा माध्यमिक बिद्यालयमा नेपाली भाषालाई बिद्यालय कोर्समा राख्न लगाएर आफैले पढाउन गरेको पार्वतीको त्याग र योगदानको अहिले अष्ट्रियामा सम्झना भईरहेको छ ।
अधिकारीले नेपालमा रहँदापनि पाल्पा तानसेनको त्रिभुवन वहुमुखी क्याम्पस र जनता उच्च माविमा विज्ञान संकायमा अध्यापन गराएकी थिइन् ।
स्वर्गीय पार्वती अधिकारी काठमाडौंको स्वयम्भूमा घर भइ हाल अष्ट्रियामा श्रीमान् र दुई छोरा अनुपम र आयुषसंग बस्दै आएकी थिइन् । अधिकारीको अन्त्यष्टि अष्ट्रियामा नै माघ १७ गते गर्ने तयारी छ ।
नेपालमा हुँदा पार्वती त्रिभुवन बहुमखी क्याम्पस तानसेन पाल्पामा २०५५ देखि ५७ सम्म उनी स्ववियूको कोषाध्यक्ष समेत भएकी थिइन् । २०३२ सालमा पाल्पाको रामपुर १० गेझामा जन्मिएकी अधिकारीपाँच दाजुभाइ र ३ दिदीबहिनीमध्येकी एक हुन् । पार्बती अधिकारी नेपाली कांग्रेस पाल्पाका पुर्ब उपसभापती कृष्णप्रसाद अधिकारीकी कान्छि वहिनी हुन् ।