इरानको मिसाइल आक्रमणमा ५० अमेरिकी सेनाको मष्तिष्कमा दर्दनाक चोट लागेको खुलासा
प्रकाशित मिति : माघ १४, २०७६ मंगलबार
इरानले जनवरीको सुरुमा इराकमा रहेको अमेरिकी निशानामा गरेको मिसाइल आक्रमणमा ५० जना अमेरिकी सेनाको मष्तिष्कमा दर्दनाक चोट लागेको खुलासा भएको छ । यो मिसाइल आक्रमणमा अमेरिकाले उतिबेला आफ्नो तर्फ कुनै क्षति नभएको बताएको थियो ।
पछि पेन्टागनले ३४ जनामा मष्तिष्कमा दर्दनाक चोट लागेको बताएको थियो भने त्यसपछि थप १६ जनामा यस्तो चोटपटक लागेको फेला परेको छ । ५० जनामध्ये ३१ जनाको इराकमा नै उपचार गरिएको छ भने उनीहरु ड्युटीमा फर्किसकेका छन् ।
अरु १८ जनालाई भने थप उपचारका लागि जर्मनी पठाइएको छ । यो संख्या अझ थपिन सक्ने समेत जनाइएको छ ।
इरानी मिसाइल हमलामा उक्त क्षेत्रमा रहेका कम्तीमा २ सय जनाको परीक्षण गरिएको छ । मष्तिष्कमा परेको असर तत्काल थाहा नहुने भएकाले पछि लक्षण देखिएपछि चेक गर्दा ५० जना अमेरिकी सेनामा मष्तिष्कमा असर परेको फेला परेको हो ।
गत जनवरी २ मा अमेरिकी कारवाहीमा इरानका सैन्य जनरलको मृत्यु भएपछि इरानले अमेरिकी निशानामा जनवरी ८ मा मिसाइल हानेको थियो । राष्ट्रपति डोनाल्ड ट्रम्पले मष्तिष्कमा लागेको चोट भौतिक चोटपटक जस्तो गम्भिर नहुने बताएका थिए । उनले केहीमा टाउको दुख्ने लगायतका समस्या देखिएपनि यो गम्भिर नभएको बताएका थिए ।
तर एउटा प्रभावशाली भेट्रान समुहले ट्रम्पले उक्त प्रतिकृयाको लागि माफी माग्नुपर्ने बताएका छन् । किनभने मष्तिष्कमा लागेको चोट निकै खतरनाक र गम्भिर हुने उनीहरुको तर्क छ ।