कोरोना भाइरसका कारण अमेरिकी एयरलाइन्सबाट चीनका दुईतर्फी उडान रद्द


प्रकाशित मिति : माघ १४, २०७६ मंगलबार

घातक कोरोना भाइरसको संक्रमण फैलिदै गएपछि अमेरिका र चीनबीचका कैयन उडानहरु रद्द गरिएको छ । युनाइटेड एयरलाइन्सले बेइजिङ, हङकङ र सांघाई जाने र त्यहाँबाट अमेरिका आउने कैयन उडानहरु रद्द गरेको जनाएको छ ।

फरबरी १ देखि ८ सम्मका कम्तीमा २४ राउण्डट्रिप उडानहरु रद्द गरिएको छ । रद्द गरिएका उडानहरुमा हङकङबाट सान फ्रान्सिस्को र नेवार्कका उडानहरु, बेइजिङबाट वासिंटन डिसी, शिकागो र नेवार्कका उडानहरु, सांघाईबाट सान फ्रान्सिस्को, नेवार्क र शिकागोका उडानहरु रहेका छन् ।

अमेरिकन एयरलाइन्सहरुले कोरोना भाइरस संक्रमणपछि लिएको यो सबैभन्दा ठूलो निर्णय हो । अमेरिकन एयरलाइन्स, डेल्टा र युनाइटेड एयरलाइन्सले टिकटको उडानको मिति परिवर्तन गर्दा लाग्ने शुल्क मिनाहाको घोषणा गरेका छन् ।

अमेरिकन र डेल्टा एयरलाइन्सले भने आफ्ना उडानहरु रद्द गरेका छैनन् । तर अवस्थाको नजिकबाट अवलोकन गरेर भविश्यमा निर्णय लिने बताएका छन् ।

कोरोना भाइरसको संक्रमणबाट अहिलेसम्म एकसयजना भन्दा धेरैको मृत्यु भइसकेको छ । अहिलेसम्म चीनमा मात्र ४५ सय भन्दा धेरैमा संक्रमण देखिएको छ ।

अमेरिकामा अहिलेसम्म कोरोना भाइरसका कम्तीमा ५ वटा केसहरु भेटिएका छन् । अमेरिकाले आफ्ना २० वटा विमानस्थलमा आउने यात्रुहरुकाबारेमा चेकजाँच सुरु गरिसकेको छ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com