अमेरिकामा तेश्रो व्यक्तिमा कोरोना, लक्षण देखिनु अगाडि नै अर्कोमा सर्ने, लक्षण यस्ता
प्रकाशित मिति : माघ १२, २०७६ आईतबार
अमेरिकामा तेश्रो व्यक्तिमा पनि चिनिया कोरोना भाइरसको संक्रमण पुष्टी भएको छ । चीनमा ५० जनाभन्दा धेरैको ज्यान लिइसकेको यो भाइरस साउदर्न क्यालिफोर्नियामा पनि एकजना बिरामीमा देखिएको हो ।
उनी हालै कोरोना भाइरसको इपिसेन्टर चीनको युहानबाट फर्किएका थिए । यसभन्दा अगाडि शिकागोमा एकजनामा कोरोना भाइरसको संक्रमण पुष्टी भएको थियो भने सुरुमा वासिंटन राज्यमा एकजनामा कोरोना भाइरसको संक्रमण देखिएको थियो ।
गत महिना चीनमा देखिएको यो भाइरसबाट अहिलेसम्म झण्डै २ हजार संक्रममित भइसकेका छन् भने ५६ जनाको मृत्यु भइसकेको छ । चीनका स्वास्थ्यमन्त्रीले भाइरस बलियो हुँदै गइरहेको तथा संक्रमित बिरामीमा लक्षण देखिनु अगाडि नै अर्कोमा सर्ने बताएका छन् ।
भ्रुण अवधिमा समेत यो भाइरस सर्न सक्ने तथा व्यक्तिमा संक्रमणभएको एकदेखि १४ दिनको अवधिभित्र सर्नसक्ने जनाइएको छ । विगतमा झण्डै ६ सय जनाको ज्यान लिएको सार्सको भाइरस भु्रण अवधिमा नसर्ने खालको थियो ।
विश्व स्वास्थ्य संगठनले अहिलेसम्म कोरोना भाइरसलाई विश्वब्यापी स्वास्थ्य संकटकाल घोषणा गरेको छैन । चीनिया अधिकारीहरुले युहान र अरु दुईवटा सिटीहरु बन्द गराएका छन् ।
कोरोना भाइरसको संक्रमण भएमा ज्वरो आउने, दुईदेखि ७ दिनभित्र सुख्खा खोकी लाग्ने, श्वास फेर्न गाह्रो हुने, पेटमा ग्यास जम्मा हुने, पखाला लाग्ने र शरिर दुख्ने जस्ता प्रारम्भिक लक्षण देखिने जनाइएको छ । भाइरसको कडा लक्षणहरुमा १०० दशमलव ४ डिग्री वा त्यो भन्दा माथि ज्वरो आउने, मृगौला फेल हुने, निमोनिया हुने र मृत्यु समेत हुने जनाइएको छ ।
सुरुमा कोरोना भाइरस जनावरबाट मान्छेमा मात्र संक्रमण हुने बताइएको थियो । तर पछिल्लो चरण चिनिया अधिकारीहरुले यो भाइरस मान्छे मान्छेबीचमा संक्रमण भएको पाइएको बताएका छन् ।
नेपाल आउनेमा भारतीयहरु पछि चिनिया पर्यटकहरु दोश्रो नम्बरमा रहेका छन् । त्यसैले नेपाल भाइरस संक्रमणका दृष्टिकोणले अत्यन्तै जोखिममा रहेको छ ।