अहिलेसम्म १४ सयमा कोरोना भाइरस संक्रमण, चीनबाहिरमात्र ३८ जनामा, कुन देशमा कति ?
प्रकाशित मिति : माघ ११, २०७६ शनिबार
खतरनाक कोरोना भाइरसको संक्रमण चीनबाहिर पनि तीब्र गतिमा फैलिइरहेको छ । अहिलेसम्म चीनबाहिरमात्र ३८ जनामा कोरोना भाइरसको संक्रमण पुष्टी भएको छ ।
अष्ट्रेलियामा ४, फ्रान्समा ३, हंगकंगमा ५, थाइल्याण्डमा ५, सिंगापुरमा ३, अमेरिकामा २, ताइवानमा ३, मकाओमा २, मलेसियामा ३, नेपालमा १, जापानमा ३, भियतनाममा २ र साउथ कोरियामा २ जनामा संक्रमण पुष्टी भइसकेको छ ।
अहिलेसम्म चीनसहित विश्वका विभिन्न भागमा १४ सय जनामा कोरोना भाइरसको संक्रमण पुष्टी भइसकेको छ । चीनमा मात्र १३६२ जनामा भाइरसको संक्रमण पुष्टी भइसकेको छ ।
कोरोना भाइरसको इपिसेन्टर युहानमा कोरोना भाइरसको संक्रमणका कारण सार्वजनिक यातायातहरु बन्द गरिएको छ भने कैयन देशले त्यहाँबाट आफ्ना नागरिकहरुलाई बाहिर निकालिरहेका छन् । अमेरिकी कन्सुलेटले त्यहाँ रहेका अमेरिकी नागरिकहरुलाई सम्पर्क गरिरहेको छ भने सशुल्क चार्टड फ्लाइटमा सिट अफर गरिएको छ ।
युहानमा झण्डै १ सय अमेरिकी नागरिकहरु रहेका छन् । यदि अमेरिकन नागरिकसँग विवाह गरेका वा कुनै नाता भएका गैर अमेरिकी नागरिक भएमा उनीहरुलाई पनि जहाजमा खाली भएको सिट उपलब्ध गराइने जनाइएको छ ।
युहानबाट अमेरिकी कुटनीतिज्ञहरुलाई बाहिर ल्याउनका लागि चार्टड फ्लाइटको व्यवस्था गर्न लागिएको हो । युहानमा रहेको अमेरिकी कन्सुलेट बन्द गरिएको छ भने सबै कर्मचारीहरुलाई त्यहाँबाट हटाउनका लागि तयारी हालतमा राखिएको छ ।