‘नो टु अमेरिका’ नारासहित इराकबाट अमेरिकी सेना फिर्तीको माग गर्दै लाखौंको प्रदर्शन
प्रकाशित मिति : माघ १०, २०७६ शुक्रबार
इराकबाट अमेरिकी सेना फिर्तीको माग गर्दै इराकको बगदादमा लाखौंले प्रदर्शन गरेका छन् । प्रदर्शनमा परिवार र बालबालिकाहरुको समेत उपस्थीति रहेको थियो ।
नो टु अमेरिका लेखेका प्लेकार्डसहित गरिएको प्रदर्शनका क्रममा सुरक्षा व्यवस्था निकै कडा पारिएको थियो । अमेरिकी दूतावास समेत रहेको ग्रिनजोनमा समेत सुरक्षा बढाइएको थियो ।
बगदादमा अमेरिकी कारवाहीमा इरानी सैन्य अधिकारीको मृत्युपछि ग्रिनजोनमा बारम्बार रकेट आक्रमण हुँदै आएको छ । इरानी सैन्य अधिकारीको मृत्युपछि अमेरिकी सेनालाई इराक छाड्नका लागि दवाव बढिरहेको छ । हाल झण्डै ५ हजार अमेरिकी सेना इराकमा छन् ।
आक्रमण लगत्तै इराकको संसदमा पनि देशबाट अमेरिकी सेना निकाल्ने पक्षमा मतदान भएको थियो । तर ट्रम्प प्रशासनले भने इराकबाट अमेरिकी सेना फिर्तीको कुनै योजना नरहेको बताउँदै आएको छ ।
आज भएको प्रदर्शनमा प्रदर्शनकारीहरुले डोनाल्ड ट्रम्पको क्यारिकेचरसहितका पोष्टरहरु समेत बोकेका थिए । इराकको भविश्य अरु देशलाई निर्णय गर्न नदिने भन्दै प्रदर्शनकारीहरु सडकमा उत्रिएका थिए । उनीहरुले इराक इराकीहरुका लागि रहेकाले अमेरिका र इरानको हस्तक्षेप बन्द हुनुपर्ने बताएका थिए ।