डरलाग्दो कोरोना भाइरसको संक्रमणपछि चाइनामा एयरपोर्ट र रेलवे स्टेशन बन्द
प्रकाशित मिति : माघ ८, २०७६ बुधबार
डरलाग्दो कोरोना भाइरसको संक्रमणबाट कम्तीमा पनि १७ जनाको ज्यान गएपछि चाइनाको युहानमा एयरपोर्ट र रेलवे स्टेशन बन्द गरिएको छ । चाइनाको युहानबाट बाहिरजाने सबै उडानहरु रद्द गरिएको छ भने रेलवे स्टेशनका साथमा सबै सार्वजनिक यातायातहरु बन्द गरिएको छ ।
चाइनामा मात्र यो भाइरसको ५४७ जनामा संक्रमण भइसकेको छ भने विश्वब्यापी रुपमा अहिलेसम्म ५५५ संक्रमणहरु देखिएको छ । यो भाइरसको पहिलो संक्रमण मध्य डिसेम्बरमा एउटा परिवारमा देखिएको थियो ।
सुरुमा जनावरबाट मानिसमामात्र संक्रमण भएको पाइएपनि अहिले भने यो भाइरस मान्छेबाट मान्छेमा संक्रमण हुन थालेको छ । चाइनाबाट सुरु भएको यो भाइरसको संक्रमण अहिले विश्वका थप चारदेशमा समेत देखिएको छ ।
मंगलबार कोरोना भाइरसको संक्रमण अमेरिकामा पनि देखिएको हो । अमेरिकाको वासिंटन राज्यमा एक बिरामीमाथि कोरोना भाइरसको संक्रमण देखिएको हो ।
हालै कोरोना भाइरसको प्रकोप फैलिएको क्षेत्रको भ्रमण गरेर फर्केका उनीमाथि निमोनिया जस्तै लक्षणहरु देखिएपछि अस्पतालमा भर्ना गरिएको थियो । विभिन्न परिक्षणका क्रममा बिरामी कोरोना भाइरसबाट संक्रमित भएको पुष्टी भएको हो । अमेरिकामा कोरोना भाइरस संक्रमणको यो पहिलो घटना हो ।
कोरोना भाइरसको संक्रमण साउथ कोरिया, जापान र थाइल्याण्डमा पनि देखिएको छ । भाइरसको त्रासका कारण अमेरिकी विमानस्थलहरुमा चीन लगायतका देशबाट आउने व्यक्तिमाथि निगरानी बढाइएको छ । ती देशबाट आउने व्यक्तिमा बिरामीको संकेत भए नभएकोबारे विमानस्थलमा जाँचबुझ थालिएको हो ।
गतसातादेखि नै युहानबाट आउनेहरुलाई न्युयोर्कको जोन अफ केनेडी, लस एन्सलस र सान फ्रान्सिस्कोको विमानस्थलमा अमेरिकी स्वास्थ्य अधिकारीहरुले चेकजाँच सुरु गरेका थिए । मंगलबारदेखि शिकागो र एटलान्टाको विमानस्थलमा पनि चेकजाँच सुरु गरिएको छ ।