ट्रम्पबिरुद्धको महाअभियोग परीक्षण : के भइरहेको छ सिनेटमा ?
प्रकाशित मिति : माघ ८, २०७६ बुधबार
पहिलो दिनको झण्डै १३ घण्टा लामो बहसपछि अमेरिकी सिनेटले राष्ट्रपति डोनाल्ड ट्रम्पको महाभियोगको परीक्षणको लागि आधारभूत नियम स्वीकार गरेको छ । रिपब्लिकनहरुले थप साक्षीहरु बोलाउनका लागि गरेको मागलाई रिपब्लिकनहरुले अस्वीकार गरेपछि डेमोक्रेटिक अभियोजनकर्ताहरुको प्रक्रियाका सन्दर्भमा ट्रम्पका वकिलहरूसंग झगडा भएको छ ।
महाअभियोगबारेको सिनेटको कारवाही बुधबार पुनः प्रतिरक्षा र प्रश्नहरुसहित बहसको साथ शुरू हुँदैछ । ट्रम्प महाभियोग परीक्षणको सामना गर्ने तेस्रो अमेरिकी राष्ट्रपति हुन्।
ट्रम्पमाथि शक्तिको दुरुपयोग र संसदको महाभियोग अनुसन्धानमा बाधा पुर्याएको आरोप लगाइएको छ। उनले आफूले कुनै गलत कार्य नगरेको र डेमोक्र्याटहरुले राजनीतिक कारणले आफूलाई निकाल्न खोजेको आरोप लगाएका छन्।
ट्रम्पबिरुद्धको महाअभियोग प्रस्ताव गत महिना प्रतिनिधिसभाले पारित गरेको थियो । डेमोक्रेटिक बहुमत रहेको प्रतिनिधिसभाले ट्रम्पबिरुद्धको प्रस्ताव पारित गरेपनि रिपब्लिकन बहुमत रहेको सिनेटले ट्रम्पलाई दोषी ठहर गरेर पदबाट निकाल्ने अपेक्षा भने गरिएको छैन ।
सिनेटमा प्रधानन्यायाधिस जोन रोबर्टसबाट सिनेटरहरुले निष्पक्ष जुरीको काम गर्ने गरी सपथग्रहण गरेका छन् । महाअभियोग मेनेजरका रुपमा नियुक्त हाउस डेमोक्र्याट्सहरुले अभियोजनकर्ताको भूमिका निभाउनेछन् भने ट्रम्पका वकिलहरुले त्यसको प्रतिवाद गर्नेछन् ।
पहिलो दिनको प्रकृयापछि पारित नियम अनुशार हरेक पक्षलाई आगामी तीन दिनसम्म मुद्दा खोल्नका लागि सुरुवाती तर्क पेशगर्ने २४ घण्टाको समय दिइएको छ । सुनुवाई चलिरहँदा सिनेटरहरुलाई ट्वीट गर्न र साइड टक गर्न प्रतिबन्ध लगाइएको छ । साथै असम्बन्धित बाहिरी कागजात पढ्न समेत रोक लगाइएको छ ।
सुरुवाती तर्क बुधबार दिउसो सुरु हुनेछ । यो सकिएपछि अर्कोसाता सिनेटरहरुलाई प्रश्न गर्ने मौका दिइनेछ । त्यसका लागि १६ घण्टाको समय दिइएको जनाइएको छ ।
मंगलबार डेमोक्रेटिक नेता चक शुमरले पेश गरेको प्रस्तावकाबिरुद्ध ५३ जना रिपब्लिकन सिनेटहरुले मतदान गरेका छन् । प्रस्तावका पक्षमा जम्मा ४७ मत परेपछि उक्त प्रस्ताव खारेज भएको छ । सिनेटबाट अन्य डेमोक्रेटिक प्रस्तावहरु पनि अस्वीकार भएका छन् ।