अमेरिकामा पनि पहिलोपटक देखियो चिनिया भाइरस कोरोनाको संक्रमण
प्रकाशित मिति : माघ ७, २०७६ मंगलबार
चिनिया भाइरस कोरोनाको संक्रमण अमेरिकामा पनि देखिएको छ । अमेरिकाको वासिंटन राज्यमा एक बिरामीमाथि कोरोना भाइरसको संक्रमण देखिएको हो । हालै कोरोना भाइरसको प्रकोप फैलिएको क्षेत्रको भ्रमण गरेर फर्केका उनीमाथि निमोनिया जस्तै लक्षणहरु देखिएपछि अस्पतालमा भर्ना गरिएको थियो । विभिन्न परिक्षणका क्रममा बिरामी कोरोना भाइरसबाट संक्रमित भएको पुष्टी भएको हो । अमेरिकामा कोरोना भाइरस संक्रमणको यो पहिलो घटना हो ।
विभिन्न देशमा अहिलेसम्म तीनसयभन्दा धेरैमा यो भाइरसको संक्रमण देखिएको छ । चिनिया अधिकारीहहरुले युआनमा कोरोना भाइरस संक्रमणका कम्तीमा १९८ केसहरु भेटाइसकेका छन् भने बेइजिंग, सांघाई लगायतका क्षेत्रमा २० केसहरु भेटिएका छन् । कोरोना भाइरसको संक्रमण साउथ कोरिया, जापान र थाइल्याण्डमा पनि देखिएको छ । यो भाइरसको संक्रमणबाट अहिलेसम्म कम्तिमा ६ जनाको मृत्यु भइसकेको छ ।
यसभन्दा अगाडि यो भाइरस सामुन्द्रीक आहार बेच्ने मार्केटमा ज्यूदा जनावरसँगको संसर्गबाट सरेको बताइएको थियो । तर अहिले भने यो भाइरस मान्छेबाट मान्छेमा समेत सरेको पाइएको बताइएको छ ।
भाइरसको त्रासका कारण अमेरिकी विमानस्थलहरुमा चीन लगायतका देशबाट आउने व्यक्तिमाथि निगरानी बढाइएको छ । ती देशबाट आउने व्यक्तिमा बिरामीको संकेत भए नभएकोबारे विमानस्थलमा जाँचबुझ थालिएको हो । गतसातादेखि नै युहानबाट आउनेहरुलाई न्युयोर्कको जोन अफ केनेडी, लस एन्सलस र सान फ्रान्सिस्कोको विमानस्थलमा अमेरिकी स्वास्थ्य अधिकारीहरुले चेकजाँच सुरु गरेका थिए । मंगलबारदेखि शिकागो र एटलान्टाको विमानस्थलमा पनि चेकजाँच सुरु गरिएको छ ।
यो भाइरसको संक्रमण देखिनेमा अमेरिका पाँचौं हो । यसअगाडि चीन, थाइल्याण्ड, जापान र साउथ कोरियामा यसको संक्रमण देखिएको थियो ।