बन्दुक राख्न पाउनुपर्ने माग गर्दै भर्जिनियामा २२ हजारको प्रदर्शन
प्रकाशित मिति : माघ ७, २०७६ मंगलबार
बन्दुक राख्न पाउने माग गर्दै सोमबार अमेरिकाको भर्जिनियामा प्रदर्शन गरिएको छ । झण्डै २२ हजार बन्दुक समर्थकहरु प्रदर्शनमा सहभागी भएका छन् । ६ हजारले क्यापिटल स्क्वायरमा र १६ हजारले सुरक्षा गेट बाहिरपट्टी प्रदर्शन गरेका हुन् ।
मार्टिन लुथर किंग जुनियर दिवसमा गरिएको यो प्रदर्शनका लागि केही हप्तादेखि नै तयारी गरिएको थियो । प्रदर्शनमा आएकाहरु अधिकांश श्वेत रहेका थिए भने विभिन्न उमेर समुहकाहरु प्रदर्शनमा उत्रिएका थिए ।
प्रदर्शन अगाडि अमेरिकी राष्ट्रपति डोनाल्ड ट्रम्पले ट्वीट गर्दै बन्दुक राख्न पाउने अधिकारीमाथि आक्रमण भएको भन्दै डेमोक्र्याटसहरुलाई मतदान गरेमा यस्तै हालत हुने बताएका थिए । उनले डेमोक्र्याट्सलाई मतदान गरेमा बन्दुक खोस्ने बताउँदै सन् २०२० को चुनावमा भर्जिनियामा रिपब्लिकनले जित्ने बताएका थिए ।
गत बर्षको चुनावमा भर्जिनिया राज्यको संसदमा डेमोक्र्याट्सहरुले नियन्त्रण कायम गरेपछि त्यहाँ हतियारको विषय चर्किएको छ । त्यहाँका कैयन काउन्टी र सिटीहरुले हतियारको अधिकार कायम राख्नुपर्ने मागका साथ प्रस्तावहरु पारित गरेका छन् ।
त्यहाँका कम्तीमा ४० काउन्टीहरुले बन्दुक राख्न पाउनुपर्ने अधिकार कायम राख्नुपर्ने मागका साथ प्रस्तावहरु पारित गरेका छन् । डेमोक्र्याट्सहरुले बन्दुक सम्बन्धि कानुनमा संसोधन गर्न कानुन ल्याउने तयारी गरिरहँदा स्थानीय नागरिकलाई हतियार बोक्ने अधिकार दिनुपर्ने माग भएको हो ।
डेमोक्रेटिक नियन्त्रित राज्य संसदलाई बन्दुकको अधिकार खोस्न नदिन प्रदर्शन गरिएको हो । तर प्रदर्शनको पूर्व सन्ध्यामा भर्जिनियाका गभर्नरले त्यहाँ अस्थायी रुपमा संकटकालको घोषणा गरेका थिए । प्रदर्शनमा मिलिसियाहरु र घृणा फैलाउने समुहको घुसपैठ हुनसक्ने आशंकाका साथ संकटकाल घोषणा गरिएको थियो ।
सोमबारको प्रदर्शनमा बन्दुक र अन्य हतियारहरु बोक्न निषेध गर्दै संकटकाल लागु गरिएको थियो । शुक्रबार बेलुकादेखि लागु गरिएको संकटकाल आज बेलुकासम्म जारी रहनेछ । प्रदर्शनमा लाठीहरु, ब्याट र चेनहरु बोक्नसमेत प्रतिबन्ध लगाइएको थियो । मास्क लगाएर प्रदर्शनमा आउने एकजनालाई प्रहरीले पक्राउ गरेको छ ।
अमेरिकामा बन्दुकको अधिकार दुरुपयोग हुँदा यससँग सम्बन्धित कैयन घटनाहरु हुँदै आएका छन् । जसका कारण यो अधिकार सधै विवादित हुँदै आएको छ ।