न्युयोर्क टाइम्सबाट अमेरिकी राष्ट्रपतिका उम्मेदवारलाई इन्डोर्स
प्रकाशित मिति : माघ ६, २०७६ सोमबार
विश्वचर्चित संचारमाध्यम न्युयोर्क टाइम्सले अमेरिकी राष्ट्रपतिको चुनावका लागि डेमोक्रेटिक प्राइमरीका लागि उम्मेदवार एलिजाबेथ वारेन र एमी क्लोबुचारलाई इन्डोर्स गरेको छ । आयोवा ककस हुनुभन्दा एकमहिनाभन्दापनि कम अवधि बाँकी रहँदा न्युयोर्कटाइम्सले दुई महिला उम्मेदवारहरुलाई इन्डोर्स गरेको हो ।
सम्पादकीय बोर्डले उनीहरुलाई इन्डोर्स गरेको हो । न्युयोर्क टाइम्सले सन् १८६० देखि नै अमेरिकी राष्ट्रपतिको चुनावका उम्मेदवारहरुलाई इन्डोर्स गर्दै आएको छ । गत राष्ट्रपतिको चुनावमा न्युयोर्क टाइम्सले हिलारी क्लिन्टनलाई इन्डोर्स गरेको थियो ।
सन् २०२० को नोभेम्बर ३ मा हुने अमेरिकी राष्ट्रपतिको चुनावका लागि सिनेटर एलिजाबेथ वारेनले गतबर्षको फरबरीदेखि औपचारिक अभियान सुरु गरेकी थिइन् । उनको चुनावी अभियानलाई केही उच्च प्रोफाइल भएका राजनीतिज्ञहरुले समेत समर्थन गरेका छन् ।
७० बर्षीया एलिजाबेथ वारेन मासाचुसेट्सबाट अमेरिकी सिनेटरकी बरिष्ठ डेमोक्रेटिक सिनेटर हुन् । उनी सिनेटमा डेमोक्रेटिक ककसकी उपाध्यक्ष समेत हुन् ।
त्यस्तै एलिजाबेथ वारेन प्रगतिशिल उम्मेदवारका रुपमा चर्चित छिन् भने एमी क्लोबुचार मध्यपन्थी उम्मेदवारका रुपमा चर्चित छिन् । मिनेसोटाबाट डेमोक्रेटिक सिनेटर क्लोबुचारले पनि गतबर्षको फरबरीमा उम्मेदवारीको घोषणा गरेकी थिइन् ।