इरानमा सरकार विरोधी प्रदर्शन चर्किँदै, अमेरिकाको समर्थन
प्रकाशित मिति : पुस २७, २०७६ आईतबार
इरानको राजधानी तेहरान तथा इरानका अन्य विभिन्न सहरमा सरकारविरोधी प्रदर्शन चर्किएको छ। प्रदर्शनकारीहरूले सर्वोच्च नेता आयतूला अली खामनेईको विरोधमा नारा लगाएका छन् ।
इरानको सरकार विरोधी प्रदर्शनको अमेरिकाले समर्थन गरेको छ । प्रदर्शनको तस्वीर सामाजिक सञ्जालमा राख्दै अमेरिकाले इरानमा सरकार विरोधी प्रदर्शनमा आफ्नो समर्थन रहेको जनाएको छ ।
तेहरानमा प्रदर्शनकारीहरूले गत हप्ता अमेरिकी हवाई आक्रमणमा मारिएका सैन्य नेता कासिम सुलेमानीका तस्बिर पनि च्यातेका छन्।
एक सय ७६ जनाको ज्यान जानेगरी तेहरानमा भएको विमान दुर्घटनाबारे सरकारले झुट बोलेको भन्दै विरोध सुरु भएको हो।
प्रदर्शनकारीलाई तितरबितर पार्ने प्रयासमा अश्रुग्यास प्रहार गरेको छ भने कैयौँ व्यक्ति पक्राउ परेका छन्।
इरानी नागरिकसहित विभिन्न देशका यात्रु चढेको युक्रेनी विमान इरानी क्षेप्यास्त्र प्रहारका कारण भुइँमा खसेको थियो। पहिला क्षेप्यास्त्र प्रहार नभएको दाबी गरेको भए पनि शनिवार इरानी सेनाले मानवीय त्रुटिका कारण त्यसो हुन गएको स्वीकारेको थियो।
इरानको रेभलूशनरी गार्ड्स कोरका प्रमुख हुसेन सलामीले संसद्मा बोल्दै विमान खसालिनु अनुचित भए पनि त्यो घटना भइसकेको टिप्पणी गरेका छन्। ठूलो सङ्ख्यामा सुरक्षाकर्मी परिचालन गरिए पनि प्रदर्शनकारीहरू विरोध कार्यक्रममा सहभागी भएका छन् । सडकमा दङ्गा प्रहरीका साथै मोटरसाइकलमा रेभलूशनरी गार्ड्सका सैनिक खटिएका छन्।