यसकारण मारिएको थियो सुलेमानी : इरानका सैन्य जनरल मारिनुको भित्रिकथा
प्रकाशित मिति : पुस २५, २०७६ शुक्रबार
इरानका सैन्य जनरल कासिम सुलेमानीलाई मार्ने निर्णय अमेरिकाको आकस्मीक निर्णय थिएन । यो योजनाका मुख्य योजनाकार अमेरिकी विदेशमन्त्री माइक पम्पिओ रहेको खुलासा भएको छ । पम्पिओले यो निर्णयका लागि अमेरिकी राष्ट्रपति डोनाल्ड ट्रम्पलाई कन्भिन्स गरेका थिए ।
ट्रम्प प्रशासनमा प्रभावशाली राष्ट्रिय सुरक्षा अधिकारीका रुपमा चिनिन्छन् माइक पम्पिओ । विभिन्न श्रोतका अनुशार सुलेमानीलाई युद्धमैदानमा ल्याएर सिध्याउने योजना झण्डै एकदशकदेखिको हो । पम्पिओले आफ्नो कुटनीतिक जीवनको अवधिभर नै मध्यपूर्वमा समस्याको जड इरान रहेको र सुलेमानी इरानका छाया कमाण्डर रहेको विश्वास गर्दै आएका छन् । सुलेमानी मध्यपूर्वभर राज्य समर्थित आतंकवादका मास्टरमाइण्ड रहेको पम्पिओको विश्वास छ ।
सुलेमानीले अमेरिकी जनताको जिवनलाई जोखिममा राखेर अमेरिकाबिरुद्ध सकृय षड्यन्त्र गरिरहेकाले सुलेमानीलाई समाप्त पार्नु आफूहरुले सही निर्णय भएको पम्पिओले बताएका थिए । पम्पिआले नै सुलेमानीले अमेरिकाबिरुद्ध गरेका षड्यन्त्रहरुबारे ट्रम्पलाई प्रमाणहरु दिएका थिए ।
पम्पिओका कैयन साथीहरु अहिलेपनि मध्यपूर्वमा अमेरिकी सेनाको नेतृत्व तहमा कार्यरत छन् । सुलेमानी मध्यपूर्वमा सयौं अमेरिकी सेनाको मृत्युको लागि जिम्मेबार रहदै आएको पम्पिओको विश्वास छ । इराकी युद्धमा सुलेमानीको युनिटले अमेरिकी सेनाबिरुद्ध प्रयोग गर्न निकै खतरनाक हतियारहरु प्रदान गरेको अमेरिकी विश्वास रहेको छ । इरानले यसको अस्वीकार गर्दै आएपनि सयौं अमेरिकीको हत्या र हजारौंलाई घाइते बनाउनमा सुलेमानी नै जिम्मेबार रहेको अमेरिकी अधिकारीहरुको विश्वास छ ।
इराक र सिरियामा इरानी सैन्य अपरेशनका मुख्य योजनाकार नै सुलेमानी हुन् । पम्पिओले सुलेमानीलाई समाप्त नपारेसम्म आफू सेवानिबृत्त नहुने बताउँदै आएका थिए ।
अमेरिकी सरकारले अर्को कुनै पनि देशको सरकारको अंगलाई आतंककारी संगठन घोषणा गरेर त्यसको नेतृत्वलाई समाप्त पारेको यो नै पहिलो पटक हो । सुलेमानीले सन् १९९८ देखि उक्त फोर्सको नेतृत्व गर्दै आएका थिए । गत जुनमा सुलेमानीकै योजनामा इरानले अमेरिकी ड्रोनमाथि आक्रमण गरेको थियो । तर पनि पम्पिओले ट्रम्पलाई सुलेमानीको हत्याका लागि कन्भिन्स गर्न सकेका थिएनन् ।
गत डिसेम्बर २७ मा इराकको किरकुकमा भएको रकेट आक्रमणमा निशस्त्र अमेरिकी कन्ट्रयाक्टरहरुको मृत्यु भएको थियो । त्यसपछि भने पम्पिओले ट्रम्पलाई कन्भिन्स गर्न सफल भए । डिसेम्बर २९ मा काताइब हिजबुल्लाहबिरुद्धको अमेरिकी कारवाहीमा २५ जना मारिए, यो संगठनले इराकी नेताहरुलाई कामबारे जानकारी गराउने भएपनि इरानबाट प्रभावित रहदै आएको छ ।
नयाँ बर्षको पूर्वसन्ध्यामा इराकी प्रदर्शनकारीहरुले अमेरिकी आक्रमणकोबिरुद्धमा इराकमा रहेको अमेरिकी दूतावासमा आक्रमण गरेका थिए । त्यसपछि लिबियामा सन् २०१२ मा अमेरिकी कुटनीतिज्ञहरु मारिएजस्तै घटना हुने हो कि भनेर अमेरिकी राष्ट्रपति ट्रम्प चिन्तित हुँदै आएका थिए । त्यस्तै सन् १९७९ मा पनि इरानीहरुले त्यहाँ रहेको अमेरिकी दूतावासमा आक्रमण गरेर ५२ अमेरिकनलाई ४४४ दिनसम्म बन्धक बनाएका थिए ।
सुलेमानीले यो भन्दा पनि अझ घातक हमलाको योजना बनाएको अमेरिकी खुफियाले पत्ता लगाएको थियो । त्यसपछि डराएका ट्रम्पले सुलेमानीलाई मार्ने कारवाहीका लागि अनुमति दिएका थिए ।