१७६ को ज्यान जानेगरी जहाजमा मिसाइल हानेको दावी गरिएको भिडियो सार्वजनिक
प्रकाशित मिति : पुस २४, २०७६ बिहीबार
इरानमा १७६ को ज्यान जानेगरी भएको युक्रेनको जहाज इरानले खसालेको दावी गरिएको भिडियो सीएनएनले सार्वजनिक गरेको छ । भिडियोमा बुधबार विहान तेहरानको आकाशमा मिसाइल हानिएको र उक्त मिसाइल आकाशमा कुनै चिजमा ठोक्किएको देखाइएको छ । त्यहीसमयमा तेहरानमा युक्रेनियन विमान उडान गरेको केही समयमा दुर्घटनाग्रस्त भएको थियो ।
भिडियोका आधिकारिकता पुष्टी भइसकेको छैन । नारिमान घारिबले उक्त भिडियो सीएनएन र न्युयोर्क टाइम्सलाई उपलब्ध गराएका थिए ।
यसअगाडि क्यानडाको जासुसीले पत्ता लगाएको क्यानेडियन प्रधानमन्त्री जस्टिन टु्रडोले दावी गरेका थिए । इरानले रसियामा बनेको मिसाइलबाट उक्त जहाज खसालेको जनाइएको थियो ।
किभका लागि उडेको युक्रेन अन्तर्राष्ट्रिय एयरलाइन्सको जेट बुधबार तेहरानबाट उडेको केहीबेरमा नै दुर्घटनाग्रस्त भएको थियो । विमानमा सवार सबै १७६ जनाको मृत्यु भएको थियो ।
मृत्यु हुनेमा ८२ जना इरानीहरु थिए भने ६३ जना क्यानेडियनहरु थिए । ११ युक्रेनी, १० स्वीडेस, ४ अफगानी, तीनजना जर्मन र ३ जना बेलायती नागरिकको पनि दुर्घटनामा निधन भएको थियो ।
क्यानडाका प्रधानमन्त्री टु्रडोले उक्त जहाज इरानले खसालेको दावी गर्दै कडा अनुसन्धान हुनुपर्ने बताएका छन् । इरानका अधिकारीहरुले विमानको ब्ल्याक बक्स इरानबाहिर लैजान नदिने बताएपछि क्यानडाका प्रधानमन्त्रीको प्रतिकृया आएको हो ।
उक्त जहाज इरानले आशयका साथ नखसालेको भएपनि दुर्घटनावश खसालेको हुनसक्ने जनाइएको छ । उक्त जहाज रसियामा बनेको मिसाइलबाट खसालेको भने अमेरिकी जासुसीसंस्था सम्बद्ध एक अधिकारीले बताएका हुन् ।