ट्रम्पबाट राष्ट्रका नाममा सम्बोधन : ‘सुलेमानी विश्वकै ठूलो आतंकवादी’
प्रकाशित मिति : पुस २३, २०७६ बुधबार
इराकमा रहेका अमेरिकी सैन्य क्यापहरुमा इरानले रकेट आक्रमण गरेपछि अमेरिकी राष्ट्रपति डोनाल्ड ट्रम्पले यसबारे राष्ट्रका नाममा विशेष सम्बोधन गरेका छन् । राष्ट्रपति ट्रम्पले झण्डै १० मिनेट बोलेका थिए भने पत्रकारका प्रश्नहरु लिएनन् ।
सम्बोधनका क्रममा राष्ट्रपति ट्रम्पले इरानको रकेट आक्रमणमा कुनै पनि अमेरिकी नमारिएको पुष्टी गरेका छन् । त्यस्तै उनले इरान युद्धको अवस्थामा नरहेको समेत दावी गरेका छन् ।
राष्ट्रपति ट्रम्पले इरानबिरुद्ध नयाँ प्रतिबन्धको समेत घोषणा गरेका छन् । उनले इरानी शासनमा नयाँ आर्थिक प्रतिबन्धहरु लगाएर दण्डित गरिएको बताएका छन् ।
इरानले आफ्नो आणविक महत्वाकांक्षा समाप्त गर्नुपर्ने कुरामा सहमत हुन अरु राष्ट्रहरुलाई पनि आब्हान गरेका छन् । इरानले आतंकवादलाई समर्थन गर्न बन्द गर्नुपर्ने र आणविक महत्वाकांक्षा त्याग्नुपर्ने बताएका छन् ।
विश्वलाई शान्तिपूर्ण र सुरक्षित बनाउन इरानसँग सहमतिमा पुग्नुपर्नेमा ट्रम्पले जोड दिएका छन् । ट्रम्पले अमेरिकी आक्रमणमा मारिएका इरानका सैन्य नेता कासिम सुलेमानी विश्वकै ठूलो आतंकवादी भएको बताएका छन् । कासिम सुलेमानीले अमेरिकी निशानामा आक्रमणको नयाँ योजना बनाएको तर आफूहरुले त्यसलाई असफल बनाएको ट्रम्पको दावी छ ।