विश्वको शक्तिशाली पासपोर्टमा जापान नम्बर वान, कुन देशको कति नम्बरमा ?
प्रकाशित मिति : पुस २२, २०७६ मंगलबार
विश्वको शक्तिशाली पासपोर्ट सुचकांकमा जापान नम्बर वान भएको छ । जापानी पासपोर्ट वाहकले विश्वका १९१ वटा देशमा विना भिसा वा पोर्ट अफ इन्ट्रीमै भिसा प्राप्त गरेर यात्रा गर्न पाउनेछन् । सन् २०२० का शक्तिशाली पासपोर्टको सुची हेन्ली पासपोर्ट इन्डेक्सले प्रकाशित गरेको हो ।
त्यस्तै सिंगापुरको पासपोर्ट १९० स्कोरसहित विश्वको दोश्रो शक्तिशाली पासपोर्ट भएको छ । दक्षिण कोरिया र जर्मनीको पासपोर्ट १८९ स्कोरसहित विश्वका तेश्रो शक्तिशाली पासपोर्ट भएका छन् ।
टपटेनमा युरोपका देशहरु अग्रपंक्तिमा देखिएका छन् । फिनल्याण्ड र स्पेनको चौथो नम्बरमा छन् भने लक्जेम्बर्ग र डेनमार्क पाँचौं नम्बरमा छन् ।
त्यस्तै स्वीडेन र फ्रान्स छैठौं नम्बरमा छन् । सातौं नम्बरमा भने स्वीटजरल्याण्ड, पोर्चुगल, नेदरल्याण्ड, आयरल्याण्ड र अष्ट्रिया रहेका छन् ।
अमेरिका र बेलायतको पासपोर्ट आठौं नम्बरमा छन् । नवौं नम्बरमा न्युजिल्याण्ड, माल्टा, चेक रिपब्लिक, क्यानडा र अष्ट्र्रलियाका पासपोर्ट छन् भने दशौं नम्बरमा स्लोभाकिया, लिथुआनिया र हंगेरीका पासपोर्ट छन् ।
विश्वका सबैभन्दा कमजोर पासपोर्टमा पहिलो नम्बरमा अफगानिस्तान रहेको छ । जसबाट जम्मा २६ वटा देशमा विना भिसा वा भिसा अन एराइभलमा यात्रा गर्न सकिन्छ ।
कमजोर पासपोर्टमा इराक दोश्रो, सिरिया तेश्रो, सोमालिया र पाकिस्तान चौथो, यमन पाँचौं, लिबिया छैठौं, नेपाल र प्यालेस्टाइन सातौं, नर्थ कोरिया र सुडान आठौं नम्बरमा परेका छन् ।
सम्पूर्ण सुचकांक यहाँ हेर्नुहोला ।