जलवायु परिवर्तनको मर्मसहित न्युयोर्कको टाइम्स स्क्वायरमा सन् २०२० को स्वागत गरिदै
प्रकाशित मिति : पुस १५, २०७६ मंगलबार
जलवायु परिवर्तनको मर्मसहित न्युयोर्कको टाइम्स स्क्वायरमा दशकको विदाई र सन् २०२० को स्वागत गरिदैछ । आज राती १२ बजे न्युयोर्कमा क्रिस्टल बल खसालेर नयाँ बर्षको स्वागत गरिदैछ ।
नयाँ बर्षको स्वागतका लागि दशौं हजार व्यक्ति न्युयोर्कको टाइम्स स्क्वायरमा जम्मा भइसकेका छन् । १२ बज्न केही सेकेण्ड बाँकी रहँदा जलवायु परिवर्तनसँग सम्बन्धित केही शिक्षकहरु र विद्यार्थीहरुले क्रिस्टल बलको बटन थिच्नेछन् । त्यसपछि काउन्टडाउन सुरु हुनेछ र क्रिस्टल बल खसालिनेछ ।
बेलुका ६ बजेदेखि टाइम्स स्क्वायरबाट लाइभ प्रशारण सुरु गरिनेछ भने राती १२ बजेर १५ मिनेट जाँदा नयाँ बर्षको स्वागतसँग समाप्त हुनेछ । विभिन्न मुख्य अमेरिकन टेलिभिजनहरुले न्युयोर्कको टाइम्स स्क्यारमा बल खसालेको लाइभ प्रशारण गर्नेछन् । विभिन्न कलाकारहरुले सांस्कृतिक प्रस्तुतीहरु समेत दिनेछन् ।
न्युयोर्कको टाइम्स स्क्वायर नयाँ बर्षको स्वागत गर्नका लागि विश्वको सबैभन्दा सुरक्षित स्थलका रुपमा लिइएको छ । न्युयोर्क प्रहरीले पहिलोपटक ड्रोनमार्फत नयाँ बर्षको स्वागतमा गरिएको उत्सवको निरिक्षण गर्ने भएको छ ।
सुरक्षा व्यवस्था कडापार्नका लागि न्युयोर्कमा हजारौं प्रहरीहरु सिभिल ड्रेसमा खटिएका छन् । ठाउँ ठाउँमा बम सुघ्ने कुकुरहरु पनि तैनाथ रहेका छन् । गतबर्ष बर्षा र बरफिलो हावाका कारण नयाँ बर्षको उत्सव प्रभावित भएपनि यसबर्ष भने प्रभावित नहुने भएको छ ।