चुनाव जिते एकसयदिनभित्र कागजपत्रविहिनलाई नागरिकताको बाटोमा : बुटाजज
प्रकाशित मिति : पुस ९, २०७६ बुधबार
अमेरिकी राष्ट्रपतिका लागि सबैभन्दा कम उमेरका डेमोक्रेटिक उम्मेदवार ३७ बर्षका पिट बुटाजजले आफू अमेरिकी राष्ट्रपतिमा निर्वाचित भएमा सुरुको एकसयदिनभित्र कागजपत्रविहिनहरुलाई अमेरिकी नागरिकताको बाटोमा लैजाने घोषणा गरेका छन् । चुनावी अभियानका क्रममा आयोवामा उनले आफ्नो अध्यागमनबारेको योजना सार्वजनिक गरेका हुन् ।
उनले कागजपत्रविहिनलाई अमेरिकी नागरिकताको बाटोमा लैजाने कानुन नबन्दासम्म अस्थायी प्रकारको संरक्षण प्रदान गर्ने र पछि कानुन नै बनाएर ग्रिनकार्ड हुँदै अमेरिकी नागरिकताको बाटोमा लैजाने घोषणा गरेका छन् ।
उनले नाफामुलक उद्देश्यले खोलिएका सबै अध्यागमन जेलहरु बन्द गर्ने घोषणा गरेका छन् । साथै उनले महान्यायाधिवक्ताले राजनीतिक हस्तक्षेप गर्न नमिल्ने खालको स्वतन्त्र अध्यागमन अदालत प्रणाली बनाउने घोषणा समेत गरेका छन् ।
साथै कानुनी स्टाटसको पुनसमायोजन र देशनिकाला रद्द गर्नका लागि गरिएका आवेदनको फैसलाको अधिकार युएससीआईएसलाई नै दिने समेत उनको घोषणमा उल्लेख छ । उनले एसाइलमका सन्दर्भमा पनि ब्यापक परिवर्तनको घोषणा गरेका छन् ।
सीबीपीले चलाएका हिराशतहरुमा एसाइलम आवेदकलाई नराखी हेल्थ एण्ड ह्युमन सर्भिसले एसाइलम आवेदकलाई राख्ने स्थल बनाउने र त्यहाँका कामदारलाई स्वास्थ्य लगायतका विषयमा तालिम उपलब्ध गराउने पिट बुटाजजको योजनामा समावेश छ ।
भिसा प्रणालीमा सुधार गर्ने, सिमाक्षेत्रमा पर्खाल बनाउने योजनालाई अबरुद्ध गर्ने, गम्भिर अपराध गरेकाहरुलाईमात्र देशनिकालाको प्राथमिकतामा राख्ने लगायतका योजनाहरु समेत अगाडि सारेका छन् । उनका योजनाहरु आप्रवासीहरु र खासगरी ल्याटिनोहरुलाई आकर्षित गर्ने खालका रहेका छन् ।
उनले अमेरिकी राष्ट्रपतिमा अन्तिम उम्मेदवारी दिनका लागि भने डेमोक्रेटिक पार्टीभित्रको प्राइमरी जित्नुपर्नेछ । डेमोक्रेटिक प्राइमरीका लागि झण्डै डेढ दर्जन उम्मेदवारहरु चुनावी मैदानमा रहेका छन् ।