ट्रम्पबिरुद्धको महाअभियोग प्रस्ताव न्यायायिक कमिटिबाट पारित, अर्को साता हाउसमा
प्रकाशित मिति : मंसिर २७, २०७६ शुक्रबार
अमेरिकी राष्ट्रपति डोनाल्ड ट्रम्पबिरुद्धको महाअभियोग प्रस्ताव अमेरिकी संसदको तल्लो सदन प्रतिनिधिसभाको न्यायाकि समितिबाट पारित भएर अगाडि बढेको छ । सत्ताको दुरुपयोग र सदनको रुकावट लगायतका अभियोगसहितका दुईवटा प्रस्तावहरु संसदमा अगाडि बढेपछि अब अर्को साता महाअभियोग प्रस्तावमा मतदान हुने भएको छ ।
लामो बहसपछि हिजो नै प्रस्तावहरुबारे न्यायिक समितिमा मतदानको कार्यक्रम रहेपनि हिजो भने मतदान हुन सकेन । आज भएको मतदानमा डेमोक्र्याट्सहरुले प्रस्ताव संसदमा लैजानका लागि समर्थन गरेका छन् भने रिपब्लिकनहरुले सर्मथन गरेका छैनन् । एकजना डेमोक्रेटिक सांसद भने विरामी भएका कारण मतदानमा उपस्थीत हुन सकेनन् ।
महाअभियोग प्रस्ताबका दुईवटा आर्टिकलहरुमध्ये एउटामा ट्रम्पले शक्तिको दुरुपयोग गरेर आफ्ना राजनीतिक प्रतिद्धन्दीमाथि अनुसन्धानका लागि युक्रेनलाई दवाव दिएको तथा अमेरिकी सुरक्षा सहायता र ह्वाइट हाउसको बैठक रोकेको आरोप लगाइएको छ । अर्कोमा गवाहहरुलाई रोकेर अनुसन्धानमा बाधा हालेको तथा उपस्थीतिका लागि दिइएको सुचना अवज्ञा गरेको आरोप लगाइएको छ ।
अब यी दुईवटै आर्टिकलहरु प्रतिनिधिसभामा मतदानमा लागि लगिने भएको छ । यदि प्रतिनिधिसभामा साधारण बहुमतबाट यो पारित भएमा ट्रम्प अमेरिकी इतिहासमा औपचारिक रुपमा महाअभियोग लगाइएका तेश्रो राष्ट्रपति हुनेछन् । यस अगाडि न्यायायिक समितिबाट महाअभियोग प्रस्ताव अगाडि बढेपछि रिचार्ड निक्सनले राजिनामा दिएका थिए ।
अमेरिकी संसदको प्रतिनिधिसभामा महाअभियोग प्रस्तावमा अन्तिम मतदानको मिति अझै तोकिएको छैन । तर यो आगामी बुधबार हुनसक्ने सम्भावना रहेको छ ।
त्यसपछि अमेरिकी सिनेटमा सर्बोच्च अदालतका प्रधानन्यायाधिसको अध्यक्षतामा यसबारे परीक्षण हुनेछ । यसैबीच राष्ट्रपति ट्रम्पले ट्वीट गर्दै आफूले यो लामो प्रकृयालाई नराम्रो नमान्ने किनकी आफूले जालसाजी गर्ने मुखबीर (ह्वीसलब्लर) लाई देख्न चाहेको बताएका छन् ।