होटेलमा आक्रमण, पाँचको मृत्यु
प्रकाशित मिति : मंसिर २६, २०७६ बिहीबार
सोमालियाको राजधानीस्थित एक होटेलमा जिहादीले गरेको आक्रमणमा पाँचजनाको मृत्यु भएको छ । आक्रमणमा तीन सर्वसाधारणसहित दुई सुरक्षाकर्मीको मृत्यु भएको हो । हमलामा केही आक्रमणकारी पनि मारिएका छन् ।
मंगलबार साँझ भएको सो आक्रमणको जिम्मा इस्लामिक समूह ‘अल सबाब’ले लिएको छ । राजधानी मोगादिसुमा रहेको सो होटेल राजनीतिज्ञ, उच्चस्तरीय सैनिक अधिकारी र कूटनीतिज्ञहरू भेला हुने प्रख्यात स्थलका रूपमा रहेको बताइन्छ । आक्रमणको समयमा होटेलभित्र उच्च तहका अधिकारीको बैठक चलिरहेको थियो ।
‘हाम्रा बहादुर सुरक्षा अधिकारीहरूले होटेलमा भएको आक्रमणलाई निस्तेज बनाए । आक्रमणको समयमा सरकारी अधिकारी र विदेशी अतिथिलगायत ८० भन्दा बढी व्यक्ति होटेलमा थिए,’ प्रहरीद्वारा जारी विज्ञप्तिमा भनिएको छ । आक्रमणमा नौ सर्वसाधारण र दुई सैनिक सामान्य घाइते भएका छन् ।
आक्रमणकारीहरू प्रहरीको पोसाक लगाएर होटेलमा पुगेकोले उनीहरूलाई विनाअनुसन्धान होटेलमा प्रवेश गर्न दिइएको प्रत्यक्षदर्शीले बताएका छन् । आक्रमणकारीले बन्दुक र ग्रिनेडलगायतका हतियारले आक्रमण गरेका थिए । यसअघि सोही होटेल र नजिकैको स्थानमा भएका तीन भीषण आतंककारी आक्रमणको पनि अल सबाब समूहले नै जिम्मा लिएको थियो ।
टर्कीका राष्ट्रपति रेसेप तयिप एर्डोगानको भ्रमणको पूर्वसन्ध्यामा जनवरी २०१५ मा यसै होटेलमा भएको एउटा आत्मघाती कारबम विस्फोटमा परी पाँच व्यक्तिको मृत्यु भएको थियो ।