विश्वको अग्लो शिखर सगरमाथाको उचाई कति ? ८८४४ वा ८८४९ ?
प्रकाशित मिति : मंसिर १३, २०७६ शुक्रबार
विश्वको अग्लो शिखर सगरमाथाको उचाई ८ हजार ८ सय ४९ दशमलव ८ मिटर रहेको सीएनएनले उल्लेख गरेको छ । सीएनएनमा आज प्रकाशित विशेष रिपोर्टमा ‘नेपाल र तिब्बतको सिमानामा पर्ने सगरमाथाको उचाई २९ हजार ३५ फिट’ रहेको उल्लेख गरिएको छ ।
सगरमाथाको उचाई विश्वब्यापी रुपमा २९ हजार २९ फिट मानिदै आएको छ । नेपालमा गएको भूकम्पका कारण सगरमाथाको उचाई घटेको हुनसक्ने बताइरहदा सीएनएनले भने ६ फिट बढाएर उल्लेख गरेको छ ।
यद्यपी सन् १९९२ मा इटलीले सगरमाथाको उचाई २९ हजार २२ फिट मापन गरेको थियो । तर सन् १९९९ मा अमेरिकी वैज्ञानिकहरुले सगरमाथाको उचाई नापेर २९ हजार ३५ फिट रहेको बताएका थिए ।
चीन, डेनमार्क, भारतले पनि सगरमाथाको उचाई नापेर फरक फरक बताउँदै आएका छन् । चीनले नेपाल सरकार र अन्य निकायहरुलाई २९ हजार १७ फिट उचाईलाई मान्यता दिन दवाव दिदै आएको छ ।
हालै नेपाली टोली पनि सगरमाथाको उचाई नापेर फर्किएको छ । तर अहिलेसम्म सगरमाथाको उचाई कति छ भन्नेबारे यो टोलीले पनि विवरण सार्वजनिक गरेको छैन । सन् २००५ मा चीनले गरेको सर्वेक्षणमा सगरमाथाको उचाई समुन्द्री सतहदेखि ८ हजार ८ सय ४४ मिटर मात्र रहेको भनिएको थियो ।