लण्डनमा उबरमाथि प्रतिबन्ध, ४५ हजार ड्राइभरको रोजीरोटी संकटमा
प्रकाशित मिति : मंसिर ९, २०७६ सोमबार
राइड एप्लीकेशन उबरको लण्डनको लाइसेन्स खारेज भएको छ । लण्डनको यातायात नियमनले उक्त सिटीमा उबर चलाउन सोमबार प्रतिबन्ध लगाएको हो । यात्रुको सुरक्षालाई उबरले जोखिममा राखेको भन्दै लण्डनका उबर चलाउनका लागि दिइएको अनुमति खारेज गरिएको हो ।
अमेरिकाको सान फ्रान्सिस्कोमा मुख्यालय रहेको उबरले लण्डनको निर्णयबारे अपिल गर्ने जनाएको छ । न्युयोर्क स्टक एक्सचेन्जमा सोमबार विहान उबरको शेयरमा एकप्रतिशतले गिरावट आइसकेको छ ।
ट्रान्सपोर्ट फर लण्डनले पहिलोपटक सन् २०१७ मा उबरको लाइसेन्स खारेज गरेको थियो । त्यसपछि मामला अदालतमा गएपछि न्यायाधिसले उबरलाई पहिलो पटक १५ महिनाको अस्थायी अनुमति दिएका थिए भने गत सेप्टेम्बरमा टीएफएलले २ महिनाको अस्थायी अनुमति दिएको थियो ।
My statement on TfL’s Uber decision. pic.twitter.com/uMDjoIlqOW
— Mayor of London (@MayorofLondon) November 25, 2019
उबरसँग अहिलेको निर्णयबारे अपिल गर्ने २१ दिनमात्र रहेको छ । लण्डनमा उबरका ४५ हजार चालकहरु रहेका छन् भने ३५ लाख यात्रुहरु रहेका छन् । लण्डन उबरको सबैभन्दा ठूलो युरोपको बजार हो ।
उबरमा एउटा ड्राइभरको एकाउन्टमा अर्कै अनाधिकृत व्यक्तिले समेत फोटो अपलोड गर्नसक्ने र त्यस्ता एकाउन्टहरु कम्तीमा १४ हजार रहेको टीएफएलले जनाएको छ । जसका कारण यात्रा असुरक्षित हुने गरेको छ । लण्डनका मेयर सादिक खानले पनि टीएफएलकै निर्णयको पक्षमा बोलेका छन् ।