यस्तो छ अमेरिकी राष्ट्रपति डोनाल्ड ट्रम्पको स्वास्थ्य, चलाईदैछ यी औषधी
प्रकाशित मिति : मंसिर ८, २०७६ आईतबार
अमेरिकी राष्ट्रपतिको स्वास्थ्यबारे डाक्टर सञ्जय गुप्ताको विशेष रिपोर्ट सीएनएनले प्रकाशित गरेको छ । राष्ट्रपति डोनाल्ड ट्रम्प अघोषित र अप्रत्यासित रुपमा वाल्टर रिड नेशनल मिल्ट्री मेडिकल सेन्टरमा उपचारका लागि गएपछि उनको स्वास्थ्यबारे जनचासो बढेको हो । ७३ बर्षीय राष्ट्रपति ट्रम्प अकस्मात अस्पताल जानुले जनचासो बढ्नु स्वभाविक रहेको रिपोर्टमा जनाइएको छ ।
गत शनिबारको उनको अस्पताल चेकअप अनिश्चित भएकाले सार्वजनिक नगरिएको ह्वाइट हाउसले जनाएको छ । झण्डै एकघण्टासम्म चेकअप गरिएको , छातीमा कुनै पीडा महसुस नभएको र आपतकालिन खालको कुनै अवस्था नआएको ह्वाइट हाउसले जनाएको छ ।
शनिबारको चेकअपको रिपोर्ट पनि आइसकेको छ । उनको रगतमा क्लोस्टोरलको मात्रा १६५ मिलिग्राम प्रति डेसिलिटर पाइएको छ । जसमा एचडीएल ७०, एलडीएल ८४ र नन एचडीएल ९५ रहेको छ । रिपोर्टको पूर्ण सारांश आगामी बर्षको मेडिकल रिपोर्टमा समावेश गरिने भएको छ ।
अमेरिकी राष्ट्रपति ट्रम्पले राष्ट्रपतिको चुनावमा उम्मेदवारी दिनेबेलामा एउटा स्वास्थ्य रिपोर्ट सार्वजनिक गरेका थिए, जसमा उनले हरेक दिन ८५ एमजीको एस्पीरिन लिने गरेको जनाइएको थियो । उनको स्वास्थ्य एकदम राम्रो भएको भन्दै तयार पारिएको उक्त रिपोर्ट पछि ट्रम्प आफैले बनाएको भन्दै विवादमा आएको थियो ।
गत फरबरीमा ट्रम्पको स्वास्थ्य परीक्षणका क्रममा आएको रिपोर्टमा उनको तौल २४३ पाउण्ड रहेको जनाइएको छ । जुन सन् २०१८ को जनवरीको रिपोर्टको तुलनामा ४ पाउण्ड बढी हो । ६ फिट ३ इन्च अग्ला राष्ट्रपति ट्रम्पको गत फरबरीको रिपोर्टमा मुटुको धडकन प्रतिमिनेट ७०, रक्तचाप ११८ ८०, कोलेस्ट्रोल १९६ रहेको उल्लेख थियो । त्यतीबेला चिकित्किसले विभिन्न औषधीहरु सिफारिस गरेका थिए ।
सन् २०१८ को जनवरीमा भने राष्ट्रपति ट्रम्पको कोलेस्ट्रोल बढेर २२३ पुगेको थियो । रक्तचाप १२२ ७४ रहेको थियो । कोलेस्ट्रोलको उपचारका लागि १० एमजीको औषधी चलाइएकोमा सन् २०१९ मा बढाएर ४० एमजीको औषधी चलाइएको थियो ।
ट्रम्पलाई प्रोस्टेट, कोलेस्ट्रोल र मुटुको औषधी दिइएको छ भने विभिन्न भिटामिनहरुसमेत दिइएको छ । यद्यपी ट्रम्पमा कुनै गम्भीर समस्या भने देखिएको छैन ।
