रूसका राष्ट्रपति भ्लादिमिर पुटिनले नेपाल भ्रमण गर्ने तयारी, सम्भवत डिसेम्बर अन्तिम साता
प्रकाशित मिति : मंसिर ५, २०७६ बिहीबार
रूसका राष्ट्रपति भ्लादिमिर पुटिनले नेपाल भ्रमण गर्ने तयारी अगाडि बढेको नेपाली संचारमाध्यमहरुले जनाएका छन् । आगामी डिसेम्बर अन्तिम साता पुटिनले नेपाल भ्रमण गर्ने तयारी अघि बढेको जनाइएको छ ।
राष्ट्रपति पुटिनको तीनदिने नेपाल भ्रमणबारे कुरा भएपनि मिति भने तय नभएको तर रुसबाट डिसेम्बर अन्तिम साताका लागि प्रस्ताव आएको जनाइएको छ ।
नेपालमा रहेको युरेनियमको उत्खनन र खरिद गर्न चासो लिँदै रूसले पुटिनको भ्रमणको तयारी गरेको जनाइएको छ । खानी तथा भूगर्भ विभागको टोलीले मुस्ताङको लोमाङथानमा १० किमि लम्बाइ र तीन किमि चौडाइ क्षेत्रमा युरेनियम भएको पुष्टि गरेपछि सो क्षेत्रको निगरानी नेपाली सेनाले गर्दै आएको छ।
मकवानपुर धियालको तीनभंगाले, मकवानपुरकै चिरुवा र चाँदेखोला, काठमाडौंको उत्तर पश्चिमी क्षेत्र, शिवपुरी, नुवाकोटको ककनीलगायतका भेगमा समेत युरेनियम रहेको विभागको ठहर छ। अहिलेसम्मको अध्ययनअनुसार ठूलो र फराकिलो खानी भने लोमाङथानमा रहेको पुष्टि भएको छ।
पुटिन भ्रमणका क्रममा नेपाललाई ३ खर्ब रुपियाँ हाराहारीको ‘सफ्ट लोन’ दिने प्रारम्भिक प्रस्तावसमेत आएको मन्त्रिपरिषद् कार्यालयले जनाएको छ। उच्चस्तरीय भ्रमणको वातावरण तय गर्न परराष्ट्रमन्त्री प्रदीप ज्ञवाली आज रूसको राजधानी मस्को जाँदै हुनुहुन्छ।
उहाँ रसियाली समकक्षी सर्गेइ लावरोवको मैत्रीपूर्ण निमन्त्रणामा मस्को जान लाग्नुभएको परराष्ट्र मन्त्रालयले जनाएको छ। नेपाल र तत्कालीन सोभियत संघबीच सन् १९५६ मा कूटनीतिक सम्बन्ध स्थापना भएको हो। औपचारिक सम्बन्ध स्थापना भएको यति लामो अवधिमा सो मुलुकका तर्फबाट नेपालमा उच्चस्तरीय भ्रमण भएको छैन।
नेपालका तर्फबाट भने पूर्वराजाहरू महेन्द्रले सन् १९५८, वीरेन्द्रले सन् १९७६ मा र तत्कालीन प्रधानमन्त्री माधवकुमार नेपालले सन् २०१० मा रूसको भ्रमण गर्नुभएको थियो।