मतदाता नामावली दर्ताका लागि २० मिलियन खर्च गर्दै ब्लुमबर्ग
प्रकाशित मिति : मंसिर ४, २०७६ बुधबार
अमेरिकी राष्ट्रपतिको चुनावी मैदानमा होमिएका अमेरिकाका नवौं तथा विश्वका चौधौं धनाढ्य माइकल ब्लुमबर्गले मतदाता नामावली दर्ताका लागि २० मिलियन खर्च गर्ने भएका छन् । उनले झण्डै ५ लाख मतदाता नामावली दर्ताका लागि उक्त रकम खर्चिने भएका हुन् ।
ट्रम्पसँग तीब्र प्रतिस्पर्धा हुने मानिएका पाँचवटा राज्यमा डेमोक्रेटिक आस्था राख्ने ५ लाख मतदाताको नाम मतदाता नामावलीमा दर्ता गराउनका लागि ब्लुमबगले उक्त रकम खर्चिने जनाइएको छ । अफ्रिकन अमेरिकन, एसियन, ल्याटिनो, जवान मतदाता र ग्रामिण क्षेत्रमा बस्नेहरुलाइ ब्लुमबर्गले प्राथमिकतामा राखेका छन् ।
ट्रम्पलाई चारवटा चुनावमा आक्रमण गर्नका लागि १ सय मिलियनको अनलाइन चुनावी अभियान संचालनको खुलासा गरे लगत्तै ब्लुमबर्गले मतदाता नामावली दर्ताका लागि समेत खर्च गर्ने खुलासा भएको हो । यो अभियान सन् २०२० को सुरुदेखि नै एरिजोना, मिसिगन, टेक्सास, नर्थ क्यारोलिना र विसकन्सिनमा सुरु हुनेछ ।
७७ बर्षीय ब्लुमबर्गले तीनवटा राज्यका डेमेक्रेटिक प्राइमरीमा भाग लिनका लागि आफ्नो उम्मेदवारी दर्ता गराइसकेका छन् । तर उनले औपचारिक रुपमा उम्मेदवारीको घोषणा भने गरिसकेका छैनन् ।
ब्लुमबर्गको मतदाता नामावली अभियान ती राज्यहरुमा चलाइनेछ, जहाँ गत निर्वाचनमा ट्रम्पले थोरै मतान्तरलेमात्र चुनाव जितेका थिए । मिसिगन र विसकन्सिनमा ट्रम्पले १ प्रतिशत भन्दा पनि कम भोटको अन्तरमा चुनाव जितेका थिए भने एरिजोना र नर्थ क्यारोलिनामा झण्डै ३ प्रतिशत बढी मतले चुनाव जितेका थिए । टेक्सासमा भने ट्रम्पले ९ प्रतिशत बढी मत ल्याएका थिए ।